Tekiniku Monitór PDHJ, Laila da Costa hatete, bainhira atu hahú kampaña labarik sira iha maibé parte seguransa sira halo intervensaun hodi haruka fila atu labele tama iha fatin kampaña.
“Tuir monitorizasaun dezde ohin ami haree kuaze labarik sira iha maibé parte seguransa halo intervensaun kedan, ne'e hatudu katak sira-nia tinan seidauk to'o par atu tuir atividade kampaña,” dehan nia ba jornalista INDEPENDENTE bainhira hala’o monitorizasaun ba atividade kampaña kandidatu númeru 9, Armanda Berta, iha Manufahi, Kinta ( 03/03 )
Nia parte, nia dehan, kontinua hala’o monitorizasaun tanba iha semana rua nia laran kandidatu PR sira sei troka-malu hala’o kampaña iha Manufahi.
Diretór CNE Munisipiu Manufahi, Belina dos Reis hatete, maske iha labarik balun ne’ebé marka prezensa, maibé sira seidauk haree labarik sira uza atributu partidu ka kandidatu PR.
“Tuir loloos ita haree (labarik partisipa kampaña) ida ne'e viola maibé ita sei halo relatóriu ba nasionál oinsa par bele bolu kandidatu sira,” dehan nia.
Entretantu, Prezidente Komisaun Nasional Eleisaun (CNE), José Agustinho da Costa Belo lamenta ho inan-aman balun ne’ebé lori sira-nia oan ne’ebé nia idade seidauk to’o hodi tuir kampaña.
“Liga ba asuntu ne’e ami sei komunika ho ekipa susesu ho kandidatu PR atu fó xamada ida ba sira atu kumpre ba regra labele envolve labarik kiik iha tempu kampaña,” dehan José via telefone, Kinta (03/03).
Molok ne’e, nia informa, Komisariu Direitu Labarik ho CNE halo ona enkontru ho partidu politiku sira no ekipa susesu sira katak, iha aktividade kampaña bandu inan-aman sira atu lori oan ho idade kiik, tanba seidauk iha direitu ba vota.
Molok ne’e, tuir observasaun jornalista jornal INDEPENDENTE, iha loron dahuluk kampaña kandidatu PR númeru 8, Lere Anan Timur, iha munisipiu Manatuto, inan-aman balun ne’ebé partisipa iha kampaña ba Lere lori mós sira-nia oan.
Lere hala’o abertura ba kampaña eleitoral iha Munisípiu Manatutu. Apoiante husi kandidatu Lere ne’ebé partisipa mai husi Postu Administrativu Manatu Vila, Laleia, Laklubar, Soibada, Natarbora no Laklo.
Iha fatin kampaña ne’ebé realiza iha Manatuto villa, ne’ebé hetan mós observasaun husi Komisaun Nasionál Eleisaun no sosiadade sivil sira, labarik balun mós hola parte.
