CASDT harii hosi vontade povu nian hakarak hetan reprezentasaun ba sira nian aspirasaun hodi bele rezolve dezafiu moris povu nian sai hosi situasaun nakukun ba ba moris di’ak, no kria unidade, pás ba ema tomak.
“Ami nia partidu iha munisípiu 14 too suku no aldeia metin ona, para atu kompete ba festa demokrasia eleisaun parlamentár 2017,” dehan Eis Ministru Turizmu, Gil INDENDENTE hafoin enkontru ho estrutura lideransa partidu nasionál no munisípiu 13 iha sede CASDT, Aimutin Dili, Sábadu (04/02).
Partidu mai ho ninia filozofia doutrina polítika importante ‘5H’ hanesan, Hametin Unidade Nasionál, Haburas Justisa Sosiál, Habelar Solidariedade, Hadomi Nasaun no Pátria, no Hamutuk Hetan Moris Di’ak.
Iha reuniaun nasionál ne’e, lider CASDT diskute estratéjia polka partidu nian hodi halo evaluasaun no partilla informasaun ba malu hodi fó orientasaun ba koordenadór hotu- hotu atu hato’o sira nia hanoin no dezafiu hodi atu buka solusaun di’ak liu ba eleisaun ho perfeitu.
Durante reuniaun ne’e, Gil Alves ho estrutura diskute liu interese partidu nian liga ba interese nasionál kona-ba situasaun moris povu tomak ne’ebé trasa ona iha planu dezenvolvimentu nasionál.
“Ami diskute interese partidu nian liga mós ba interese moris povu nian oinsá maka ita bele tuur hamutuk atu rezolve problema,” nia hateten.
Lideransa estrutura nasionál too munisípiu ba daudauk ne’e kontinua halo programa konsolidasaun partidu nian hodi hato’o programa polítika partidu ba povu hodi bele hatene.
Liu hosi konsolidasaun ne’e, CASDT bele koko no haree ninia forsa polítika atu kompete ho pás hamutuk ho partidu 30.
Tuir programa, CASDT sei rekruta mós fiskais sira iha nivel munisípiu hodi haruka sira nia lista kandidatu ne’ebé sei haruka ba parlamentu.
Prezidente partidu ne’e aviza ba militante hotu- hotu iha eleisaun parlamentár bele hametin nafatin pás koopera ho partidu sira seluk labele hamosu konflitu ba malu.
Partidu ne’e mós loke aan ba militante partidu ne’ebé deklara afilia hosi partidu seluk tama ba CASDT.
“Militante seluk tama mai ho sira nia konsensa, ami simu sira,” tenik nia.
Gil dehan, CASDT nu’udar partidu foun, maibé sira iha esperansa sei hetan konfiansa povu tama iha parlamentu.
Fó Apoiu Ba Prezidente Ba Tomak
Entretantu iha, Eis Ministru Turizmu no Komérsiu, ne'e hatutan, sira nia parte sei konsulta ho estrutura no militante sira hodi fó apoiu ba kandidatu Prezidente Repúblika 2012-2022.
Gil dehan, sira fihir entre kandidatu PR sira ne’ebé rejista ona ba tribunál rekursu, iha kandidatu ida potensiál tebes ba sira atu fó apoiu, tanba kandidatu ne’e iha esperiénsia ukun no nu’udar lider rezisténsia ne’ebé hatene no koñese di’ak povu nia susar no terus.
“Ami fihir daudauk entre kandidatu prezidente sira ne’e, iha kandidatu ida maka ami haree nia iha esperiénsia no nia bele sai prezidente ba ema tomak liu –liu atu hametin pás no estabilidade nasionál,” dehan Gil.
Tuir planu iha tempu besik CASDT hamutuk ho militante sira sei deklara aberta hodi fó apoiu ba kandidatu prezidente ne’ebé merese too duni ona ba nia tempu atu ukun iha Palasiu Aitarak-Laran.
