Kandidatu PR, Mariano Assanami Sabino hatete, nudar transjerasionál mai ho nia historia rasik, oituan ka barak kontribui ona ba luta ukun rasik aan, hahú kedas ho vida juvenil ne’ebé lori funu ba iha Soeharto nia dapur laran.

Ohin tempu ona hambrik sai Prezidenre Repúblika hodi kontinua luta ba povu no nasaun nia moris di’ak, liu husi politika no programa ne’ebé iha hanesan, loke kampu servisu, dezenvolve ekonomia, moderniza defeza no seguransa, hametin politika esterna no interna, promove kultura politika sosial no sira seluk tan.

“Ha’u nia hambrik la iha aman ida iha ha’u nia sorin hodi konta historia para ha’u bele manan iha eleisaun, maibé ha’u hamutuk ho joven sira ne’ebé la iha historia pasadu iha palku leten hodi ko’alia joven sira nia futuru, liu husi programa ne’ebé ami iha,” dehan nia, iha kampu Futebol Manatutu, Segunda (14/03).

Assanami informa, hanesan joven tenke hambrik mesak iha nia ain leten luta hodi konkista vitoria, jerasaun foun la’os ba hambrik iha katuas sira nia sorin hodi konta sira nia historia hodi manan povu nia konfiansa.

“Sai joven labele ba hambrik iha katuas sira nia sorin hodi konta sira nia historia hodi hatun ida no hasa’e ida, ne’e joven ne’ebé la iha responsabilidade,” dehan nia.

Nudar joven ida tenke esplora nia matenek hodi haree ba oin, bainhira ukun karik atu halo saida ba povu no nasaun.

Tanba ne’e, husu ba joven sira hotu hili prezidente ne’ebé mai husi maubere oan atu nune’e bele servi povu  maubere tuir de’it lei haruka.