Observasaun diariu ne’e, iha munisípiu sira kampana hahú ona hanesan Munisípiu Manatutu, Vikeke, Baukau, Lautem, Atauru, Ermera no Likisa mós ema partisipasaun barak, maibé bainhira halo komparasaun partisipasaun masimu liu iha Maliana.
Veikulu sira kuaze nakonu tanba apoiante hirak ne'e mai husi Postu Administrativu sira hanesan, Balibo, Kailaku, Maliana-Vila, Atsabe, Bobonaru no Lolotoe, maibe iha munisípiu seluk ne'ebé kampana hala'o ona la akontese hanesan ne'e.
Durante komisiu politika, udan monu rai maibe la hamenus vontade apoiante sira hodi kontinua partisipa iha kampaña ne’e to’o remata.
Vitor Bragansa ‘Buka Tuir’, husi Organizasaun Sagrada Familia no mós Unidade Nasional Resistesia Klandestina, hanesan mós Ekipa Nasional Monitoring no Kontrola kandidatu Lere Anan Timur nian, hanesan Bobonaru oan mai suporta tan Koordenador Nasional Munisípiu Bobonaru nian Aniceto Borlelo.
Orguillu boot no garante katak apoiante la barak liu, maibe bele dehan kompara ho munisípiu seluk Bobonaru mós bele, tanba haree de'it husi ema iha ne'e nia realidade mak hatudu dadauk ne'e.
"Maski udan la fo fatin maibe sira nafatin firme ba pai Lere," dehan Vitor, iha Kampu Maliana, horisehik.
Nia afirma, hanesan partidu balun no maun balu iha osan sira bele kobre massa barak, mas husi pai Lere nian iha massa so ke ema husi postu balu dook labele to’o mai tanba mós kondisaun transporte, maibe garante husi apoiante lubun ne'ebé iha ne'e sei informa tutan ba sira ne'ebé la mai.
Fi'ar Likisa Vota 100%
Entretantu, kandidatu Lere Anan Timur, iha konfiansa ba povu Likisá hodi bele fó votu ba nia iha loron eleisaun prezidensial nian.
Nia dehan, Lere la mai ho osan atu fahe ba ema ida-idak, mas mai atu husu domin, karik sai duni prezidente republika maka domin sei lori fila-fali ba povu, tanba ne'e mak fiar aan katak ema hotu sei vota ba Lere.
Nia salienta, povu tomak hili prezidente ida mantein estabilidade politika iha rai laran. Lere mak promete duni kuandu sai prezidente sei promove estabilidade iha rai laran dialogu ba sé-sé de’it.
Kasian Garante Lere Manan iha Likisa
Nune’e, Madalena Bidau Soares ‘Kasian’, garante kandidatu Prezidente ho númeru sorteiu 8, Lere Anan Timur, sei manan iha Munispiu Likisá.
"Ne’ebé garantia katak Likisá ita hotu aten brani katak maun Lere sei manan iha Likisá no fatin seluk nia sempre manan," dehan nia.
Nia husu ba feto no inan feton sira hotu kumpre fila ba idak-idak nia fatin hodi hanoin to'o loron atu ba vota keta haluhan vota ba númeru 8, sei marka diferensa ba povu tomak.
Husu ba feto maluk no mane maluk haree didi'ak balun keta matan aat karik uza oklu hodi haree didi'ak mak fita, haree ba númeru 8 ne'e. Númeru ne'e aban bainrua sei haree matan Aat sira no Veteranu sira .
"Ita husu matebian hotu-hotu iha Munisipiu Likisa no munisípiu sira seluk saudozu, eroina sira mate tanba funu Timor nian, tenki ajuda maun boot Lere Anan Timur tenke manan iha rai Likisá," tenik nia.
