vise-Prezidente Bankada PLP, Francisco Vasconcelos hateten, situasaun iha rai laran ne’e Prezidente Repúblika mak halo konfuzaun públiku tanba, kandidatu membru governu indijita ba mós lakohi fó pose.

Nune’e, foin lalais ne’e veta tan OJE, ne’e konstituisaun mak haruka maibé iha ne'ebá ninia fundamentasaun maka kontráriu fali ho Xefe Estadu nian pensamentu rasik.

Iha ne'ebá kestiona kona-ba sustentabilidade orsamentu nian, maibé la ko'alia kona-ba diversifikasaun orsamentu iha futuru ne’e.

Atu garante sustentabilidade ne’e tenke la’o ho diversifikasaun, tanba ne’e OJE ne’e hetan veta.

“veta OJE ne’e la konsistente tanba Prezidente Repúblika dehan osan ne’e boot liu la tuir estrutura orsamentu nian ne’e kontra ona konstituisaun, maibé tanba saida mak nia labele lori ba iha Tribunál atu halo fiskalizasaun abstratu”, dehan nia, iha Uma Fukun PN, horisehik.

Nia hateten, iha forma rua atu halo reapresiasaun ka konfirmasaun, hotu-hotu di'ak tanba ne’e opsaun rua ne’e nakloke hotu.

Bainhira deputadu sira halo proposta ruma atu halo alterasaun sei halo diskusaun, maibé laiha sei halo de’it konfirmasaun hodi lori ba Xefe Estadu atu promulga.

Tanba iha artigu 88 númeru 2 ne’e ko'alia momoos ona karik ema seluk interpreta fali artigu seluk ne’e sira nia interpretasaun.

Nia hateten, haree husi prosesu ne’e husi AMP garante katak PR sei halo promulgasaun ba OJE tanba laiha dalan atu veta ba dala rua.

Antes ne’e, Prezidente Bankada FRETILIN, Aniceto Guterres hateten, osan ba agrikultura, saúde, edukasaun ne’ebé atu kontribui ba dezenvolvimentu ekonomia tau mak 1% ne’e hamosu injustisa.

“Bankada FRETILIN prontu atu kolabora, ami sei halo proposta ajuda governu atu hadi'a” dehan nia.

Nia hateten, karik halo de’it konfirmasaun votu ne’e presiza 2/3, tanba ne’e konstituisaun rasik hatuur ona.

Karik atu halo reapresiasaun muda vírgula ruma ne’e la presiza 2/3 tanba hanesan aprovasaun ba diploma baibain maioria absoluta bele haruka ba fali.