Vise-Ministru Administrasaun Estatál (MAE), José Abílio Caetano hateten, enkontru liña ministeriál atu haree prosesu oinsá fasilita komunidade sira hetan afeta dezastre naturais tanba durante ne’e apoiu to’o ba sira kleur demais.

Tanba ne'e, governu liu husi ekipa liña entre ministeriál sei planu buka fundu atu harii rezidénsia temporariu iha munisípiu 13.

“Tinan -tinan ita sempre hetan dezastre naturais. (Ne’e duni) planu halo uma boot ida atu akomoda vítima ba dezastre naturais", dehan José iha Palásiu Governu, Sesta (25/1).

Nune'e, iha Governu anteriór harii ona uma boot ida iha Munisípiu Aileu, funsaun uma hodi akomoda komunidade afetadu bainhira dezastre naturais.

Governante ne'e dehan, tuir planu enkontru liña entre ministeriál ne'e konvoka enkontru ho ekipa entre ministeriál hodi diskute kona-ba uma temporariu ba komunidade sira iha munisípiu 13 bainhira sira nia uma hetan estraga.

Nia dehan, Governu sei prepara hodi tun direta no identifika fatin, atu harii uma ba provizóriu iha munisípiu sira.

Tanba ekipa ne'e harii iha 26 Dezembru 2018, komunidade iha populasaun sira husi Munisípiu Baukau, Vikeke, Lautem afeta ba dezastre naturais hamutuk uma na’in 436 mak hetan estraga husi anin ho udan.

Entretantu, Sekretáriu estadu Protesaun Sivíl, Alexandrino de Araújo dehan, iha enkontru ne'e oinsá diskute kona-ba rekuperasaun uma sira hetan estraga husi dezastre naturais iha Dezembru tinan kotuk até ohin loron.

Nia dehan, Governu apoia emerjénsia ba nesesidade bázika liuliu ai-han ho nesesidade bázika sira seluk ba vítima sira iha Munisípiu Baukau, Vikeke no Lautem ho munisípiu seluk ne’ebé afeta ba dezastre naturais.

Tanba ne'e, ekipa liña entre ministeriál ne'e lidera husi Ministru Administrasaun Estatál, José Abílio Caetano, hodi koordena ho liña ministeriál seluk hodi rezolve emerjénsia bainhira komunidade sira afeta ba dezastre naturais.