Xanana Gusmão husu ne’e iha serimónia “Fahe Rezultadu Ne’ebé Alkansa ona no Dezafiu ne’ebé Enfrenta durante 2024; Divulga Planu Asaun Anuál no Orsamentu Ministériu Edukasaun tinan 2025” ne’ebé realiza iha CCD, Segunda (06/01/2025).

Tuir komunikadu ne’ebé Online INDEPENDENTE Asesu iha pajina Gabinete Primeiru Ministru katak, Líder nasionál ne’e husu atu tau atensaun tanba futuru Timor-Leste depende ba manorin-na’in sira, bainhira sira nia misaun di’ak maka Timor-Leste sei di’ak liu tán, tanba labarik sira ne’ebé forma daudaun sei matenek, sei lori Timor ba oin.

“Servisu saida deit mak ita halo hanesan misaun ida, liliu área saúde no edukasaun. Rua ne’e kompleta malu tebtebes, tanba babain ita ba servisu mak hetan osa. Iha edukasaun, favor ida labele sente servisu maibé tanba misaun bo’ot, iha imi nia kuiñesimentu, hahalok no vontade atu fó,” dehan PM Xanana iha Komunikadu ne’ebé Online INDEPENDENTE asesu, tersa ne’e (07/01/25).

Hafoin akompaña aprezentasaun, husu atu labele divulga uluk planu anuál ne’e bá públiku tanba Xefe Governu sei halo koresaun, liu-liu iha parte hakerek nian.

Primeiru-Ministru rekoñese katak, setór edukasaun ikus-ikus ne’e iha problema, katak problema la’ós Governu hasai ema arbiru maibé problema maka hadi’a Sistema, nune’e Governu sei haree didi’ak sistema edukasaun iha Timor-Leste.

Ikus-liu Xefe Ezekutivu ne’e fó apresiasaun bá servisu Ministériu Edukasaun liu-liu manorin na’in sira ne’ebé partisipa tebes iha dezenvolvimentu rai ida-ne’e nian, liu husi fornese edukasaun ba futuru Timor nian.