Tuir komunikadu ne’ebé Online INDEPENDENTE asesu iha pajina Gabinete Primeiru Ministru katak, Xefe Governu orienta ona ekipa MOP no SEATOU kontinua halo despezu administrativu ba uma abitante hirak ne’ebé harii iha bronjong leten iha aldeia Fomentu II no área Bebonuk nian.
Durante vizita, Xefe Governu rona mós aprezentasaun husi Xefe Suku Bebonuk, Alfredo da Costa introdus ba PM Xanana kona ba avizu ne’ebé sira nia parte halo, hodi bolu atesaun ba komunidade hirak ne’ebé hela iha mota ninin atu koopera ho governu hodi muda sira ba fatin seguru.
Alende ida ne’e, autoridade suku ne’e informa kona ba populasaun Bebonuk sira mós apoia governu liu husi MOP hodi loke luan estrada iha sira nia parte, hodi lori dezenvolvimentu tama ba suku no aldeia sira.
Iha oportunidade ne’e, Xefe Governu no membru governu na’in rua hala’o mós obserbasaun ba haree kondisaun estrada iha área Manleuana, Bebonuk no Kristu Rei, munisipiu Dili.
