Xefe DIKN Superintendente Polísia João Belo hatete, situasaun ne’ebé akontese iha loron 01 fulan-Janeiru madrugada, akontese bainhira ema akompaña tiru fugetes, ema deskoñesidu balun tiru bala ba leten hodi rezulta bala ne’e monu kona uma Eis PR Lú-Olo nian.
“Hafoin iha oras 11:30 ekipa DIKN hamutuk ho ekipa tékniku Forensik nian, ami halo mós rekonstrusaun ba fatin akontesimentu, identifika katak bala ne’e monu duni iha ne’ebá, depois ita hatene mós katak ne’e rezulta husi tiru ba leten, kilat musan ne’ebé monu ne’e nove milimetru (Prozetil Nove Milimetru), ita seidauk hatene ida ne’e mai husi kilat tipu ida ne’ebé, maibé ita hatene ona katak ne’e mai husi kilat ki’ik, maibé tipu pistola ida ne’ebé (Pistola Revolver ka Pistola Blok) ita seidauk hatene, la hanesan ho maluk sira nia publikasaun iha media sosial katak ida ne’e Pistola Revolver”, informa Xefe DIKN liu husi komunikadu ne’ebé Online INDEPENDENTE asesu iha pajina ofisial PNTL, tersa ne’e (07/01/25).
Superintendente Polísia ne’e salienta katak, ba ida ne’e DIKN mós aprezenta ona kazu ne’e bá Ministeriu Públiku, hafoin halo identifikasaun no rekonstrusaun iha fatin akontesimentu.
“Ami aprezenta ona ba Ministeriu Públiku ho númeru NUC.003/2025/PNSIK. PNTL liu husi DIKN husu apoiu mós ba parseiru sira atu halo ezame ba Prozetil ka bala ne’ebé hetan, tanba ita nia aparellu seidauk sufisiente, entaun ita husu ita nia parseiru sira atu halo ezame balistiku ba Prozetil ne’ebé ita hetan,”.
“Nune’e mós PNTL husu apoiu tanba prosesu investigasaun sei lao hela, husu apoiu ba komunidade ka ema balun ne’ebé hatene lalaok ka hare’e ema ruma tiru iha tempu ne’ebá, husu atu informa ami, atu ami bele halo prosesu investigasaun klean, tanba to’o agora ema ne’ebé tiru iha tempu ne’ebá ita seidauk hatene ka sei deskoñesidu hela”, hatutan Superintendente Polísia ne’e.
Entretantu, Ofisias Superior PNTL ne’e akresenta tan katak iha loron hanesan (01/01/25)iha oras tuku 02 madrugada, iha mós kazu ida akontese iha Kapital Dili hodi rezulta alin feto ida ho tinan ha’at (4) hetan tiru la’ós direita maibé kilat musan monu kona nia ain no oras ne’e halo hela tratamentu iha HNGV.
