Primeiru-Ministru dehan, IX Governu nia mandatu hahú iha loron ida fulan-Jullu tinan 2023, nune’e IX ukun la’ós tanba matenek liu, maibé atu hadi’a instituisaun Estadu.

Tanba tuir Xefe Governu nia haree, nasaun la’ós la'o ba oin maibé hakiduk hodi sai Estadu ida ne'ebé frazil tebes.

“Bainhira ita hahú hari rai ka nasaun ida, ita iha prosesu rua, prosesu ida mak konstrusaun nasaun no prosesu ida fali ita bolu konstrusaun Estadu. Konstrusaun Estadu husu atu ita hotu ne'ebé servi estadu no sosiedade tomak bele hadia tinan-tinan, loron, semana no fulan fulan, hadia di'ak liu tan sistema iha instituisaun Estadu nian,”dehan PM Xanana iha ambitu Isar Bandeira iha Palasiu Governu, Segunda (06/01/25).

Xefe Governu hatutan, banhira IX Governu konsolida kapasidade profisionalismu iha instituisaun Estadu mak bele temi dehan Estadu ne'e forte, maibé ida ne'e sai Estadu frazil.

Iha mundu Estadu barak frazil hela, tanba sé de'it mak sa'e ba Governu la’ós ona hare rai ne'e, maibé hare de'it ida-idak nia moris, familia no grupu.

Tanba ida ne'e mak, IX Governu Konstitusionál fó hatene bá hotu-hotu katak to'o fulan ikus tinan kotuk (2023), sei buka tuir iregularidade hotu hodi bele hahú hadi’a iha 2024.

“Ohin loron ida ne’e, bele dehan katak ita hatene ona iregularidade sira ne'e iha ne'ebé?, 2025 sai tinan ba implementasaun atu servisu maka’as hodi hadi'a povu ne'e nia moris no hodi’a nasaun ne'e,” haktuir PM Xanana.

Xefe Governu mós husu ba Komisaun Funsaun Públika (KFP) atu servisu nafatin hadia setór sira, tanba TL iha problema barak, maibé labele mós halo milagre, sei hadia neneik atu nune’e koresaun sira ne'ebé IX Governu halo sai metin, atu nune'e ba futuru instituisaun sira bele metin ona.

Entretantu, iha biban ne’e, PM Xanana mós husu ba inspesaun Jerál Estadu (IJE) atu hala'o nafatin servisu hodi fó atensaun ba instituisaun sira atu halo saida mak bele halo no labele halo.