Diretór Eskola Akadémia Múzika, Padre Domingos Alves da Costa hatete, sira nia prezensa iha palasiu Governu atu aprezenta ba Primeiru-Ministru kona bá prosesu akadémia eskola múzika no mós hato'o agradese ba Primeiru-Ministru ne'ebé hola inisiativa tomak hodi harii eskola refere.

“Mai iha ne’e atu aprezenta ba Primeriu Ministru, ba dala uluk hato'o agradese ba ajuda tomak ne'ebé loke Eskola Múzika ka AkAdémia Múzika Dom Alberto Ricardo da Silva. Eskola Múzika ne'e inisiativa ida mai husi Primeiru-Ministru ho Dom Alberto Ricardo no mós Maestru Simão Barreto desde iha indepedensia 2002 nian ne'ebé sira na’in tolu hakarak duni loke Eskola Múzika ida ne'e,” dehan Padre Domingos ba jornalista sira, hafoin remata enkontru ho Primeiru Ministru Kay Rala Xanana Gusmão, iha Palasiu Governu, Segunda (06/01/25).

Diretór Eskola hatutan, Timor iha ona Eskola Akademia Múzika, hodi hasai baze Múzika nian, tan ne'e, husu bá labarik no jovem sira ne'ebé hakarak aprende múzika no instrumentu, bele ba aprende iha Akadémia Múzika.

Tuir Padre Domingos Alves, eskola ne'e inaguradu ona iha tinan 2024 no dadaun ne’e halo hela rejistrasaun foun.

Tanba ne'e hasu ba estudante no jovem sira bele ba rejistu hodi aprende instrumentu bá múzika nian.

Entretantu, iha enkontru ne’e, Primeiru Ministru mós hato’o sujestaun ba ekipa akadémia múzika no hakarak eskola akadémia múzika refere sai hanesan nivel internasionál.

Enkuantu, hahú husi inisiu eskola ne'e eziste, akumula ona partisipante hamutuk na'in 60.