Vitima Judit de Fátima lamenta tebes ho desizaun SEATOU nian ne’ebé hasai sira ho urjente.
“Horseik (03/01) deit mai derepente dehan, agora dadauk imi prepara imi nia sasan, tuku rua lokraik pas, imi tenke sai ona, entaun nu’udar sentimentu ita ema nian, ne’e hanesan estadu mai buti kedan ita nia kakorok, sé kuando hanesan ne’e, tanba horseik sira mai, ha’u mesak ho labarik sira, horseik mak ami sai duni, ami sai ho mamuk deit,”dehan Judit ba Online INDEPENDENTE iha Aldeia Fomentu II, Sabado ne’e (04/01/25).
Ba indiminizasaun, Vitima ne’e dehan, antes ne’e ekipa SEATOU halo ona levantementu dadus no hein notifikasaun husi Obras Públika ba pagamentu nian, hafoin komunidade sira bele sai, maibé realidade seidauk iha notifikasaun ruma, ekipa SEATOU haruka sira sai ona.
“Sira mai fó avizu iha fulan-Marsu ikus, sira mós mai dala rua sukat ona uma sira ne’e, maibé sira dehan, imi hein lai, hein obras públika tun dala ida, depois notifikasaun tun. Notifikasaun tun ona, imi bele sai, notifikasaun tama ne’e signifika prosesu ona hein pagamentu, nune’e imi bele sai. Entaun ami hein ida ne’e,”haktuir vitima eviksaun Judit.
Iha fatin hanesan, Vitima eviksaun Felizarda Xavier hatete, nia sente triste tanba Governu mai hasai sira ho urjente, laiha notifikasaun ruma.
“Ha’u triste tebes, tanba besik tinan ida ona, ekipa SEATOU mai ona dala rua, ko’alia ho ami atu hasai ami, marka ona ami nia uma, nune’e sira dehan sei mai tan dala ida, ita tur hamutuk, ko’alia, ami haruka imi sai mak imi sai, maibé ida ne’e la’e, derepente deit horseik (03/01/25), madrugada ekipa SEATOU mai ona avizu dehan ami tenke sai, ami seidauk haloot hotu ami nia sasan sira, dehan ami sai ona,” dehan vitima ne’e.
Tanba ne’e, vitima akresenta, sira pronto koopera ho estadu maibé fó tempu ba sira atu sira bele haloot sira nia sasan, hafoin ekipa bele sobu sira nia uma.
Entretantu, Xefe Aldeia Fomentu II, Domingos Mendonça Sarmento hatete, tuir dadus fixu, komunidade sira iha Aldeia Fomentu II ne’ebé hetan eviksaun hamutuk uma-kain 288.
Husi dadus ne’e, vitima sira seidauk hetan notifikasaun ruma husi Governu liliu SEATOU.
“Iha levantementus kona ba dadus fixu mak iha familia uma-kain 288, maibé iha pontu ida mak komunidade sira sente tristi uituan, tanba sobu sira la ho dignu, la fó notifikasaun ruma ba ami autoridade atu aviza ba sira,”dehan Xefe Aldeia Fomentu II.
Xefe Aldeia ne’e afirma liu tan, Governu hasai komunidade sira ho urjensia tanba haree ba iha inundasaun no mota boot ne’ebé akontese iha loron 01 fulan-Janeiru ne’ebé konsege sobu komunidade sira uma hamutuk 28 iha aldeia refere, nune’e ekipa konjunta husi SEATOU deside hodi kontinua sobu komunidade uma-kain 288 nia uma ne’ebé besik iha mota ninin, atu labele sai vitima tan ba iha inundasaun refere.
“Antes ne’e laiha notifikasaun, ami foti dadus sira hatete katak, antes sobu, ami sei komunika ho autoridade sira, fó avizu, fó notifikasaun ruma ba ita boot sira para avizu ba komunidade sira atu prepara, maibé realidade laiha, sira sobu ne’e hanesan urjente deit,” tenik Xefe Aldeia.
Ho nune’e, Autoridade lokal ne’e mós husu ba vitima sira ne’ebé atu fila ba munisipiu, bele informa ba autoridade kompetente sira atu bele aranja transporte tula sira nia sasan fila ba munisipiu.
Tuir observasaun husi Online INDEPENDENTE iha terenu haree katak, vitima evikasaun sira dadaun ne’e balun fila ona ba munisipiu no balun dadauk ne’e hela ho familia sira iha Kapital Dili.
Enkuantu, ba vitima uma-kain 288 iha aldeia Fomentu II to’o agora seidauk hetan kompensesaun husi Governu.
