“Ohin abertura kopa Navál oinsá prepara imi sai joven ne'ebé hadomi bola no balun sai forsa atu nune’e ita bele kria páz no estabilidade iha Sosiedade nia leet tanba jogu ne'e iha manan no lakon tanba manan mós vitoria lakon mós ho vitória tanba lakon atu aprende jogu tuir mai bele hetan tatíku ne'ebé di'ak,” dehan XEMJ-F-FDTL Tenente Jenerál Domingos Raul “Falur Rate Laek” liu husi komunikadu ne’ebé Online INDEPENDENTE asesu iha Pájina Relasaun Informasaun Públika FALINTIL-Forsa Defeza Timor-Leste, Tersa (07/01/25).
Falur Rate Laek hatutan, nia parte partisipa iha kopa refere, atu fó solidariedade ba Komponente Navál tanba tristeza boot Forsa Armada liu-liu Komponente Navál hasoru inundasaun.
“Ohin ema hotu nia prezensa iha ne'e hanesan jestu solidaridade ba aman no maun sira,”tenik Falur Rate Laek.
Entretantu, Komadante Komponente Navál, Komodoro Higino das Neves, afirma, kopa Navál la estabelese hanesan iha tinan kotuk liu ba tanba servisu barak.
“Ohin ita realiza fali kopa Navál ho prezensa Xefe Estadu Maiór Jenerál F-FDTL, sei motiva ami liu-liu Juventude sira, tanba kopa Navál nia objetivu la’ós atu manan ka lakon maibé nia objetivu atu halibur joventude iha Timor laran tomak atu mai partisipa iha kopa ida ne'e, atu kuiñese malu, kria relasaun amizade entre pesoál ba malu no fahe mós esperiénsia abilidade ne'ebé imi iha atu utiliza iha kampu la’ós atu tuku malu no rai odio vigansa ba malu iha kampu, maibé hatudu imi nia skíll no esperiénsia ba malu,” katak Komodoro Higino.
Enkuantu, Prezidente Komisaun Kopa Navál Kapitaun Tanente, Rosario Alves da Cruz, afirma, kada tinan sempre realiza kopa Navál ne'ebé preve iha matris anuál hodi komemora ezisténsia Komponente Navál nian.
“Kopa Navál sai ona simbolu relasionamentu entre Forsa Armada ho komunidade liu-liu hakbiit talentu ba ita nia juventude sira nian atu kria paz iha komunidade nia leet,”dehan Prezidente Komisaun.
Nune’e, Prezidente Komisaun husu ba klube 17 ne'ebé iha talentu no determinasaun mai kompete iha kopa Navál.
Ida ne'e katak espiritu Desportiva prevaleza iha kada jogu liu husi devosaun no respeitu no mós disiplina ba kopa Navál.
