DILI: Traballadór Timoroan na’in 32 hamutuk ho familia asina deklarasaun ho Sekretária Estadu Formasaun Profisionál no Empregu, molok ba servisu iha Australia.

Xefe Departamentu Deslokasaun Alarico Fernandes, enkoraja foinsa’e na’in 32, ne’ebé hetán oportunidade atu ba servisu iha Australia, hatudu komportamentu ne’ebé maka di’ak.

“Ba traballador sira, ba servisu iha ema nia nasaun Australia atu manan osan no hetan esperiensia foun husi ema nia ra’in, hodi nune’e fila mai kria ekonomía família no  ekonomia nasaun Timor-Leste ni’an, liu-husi negosiu kiik sira,”dehan Xefe Departamentu Deslokasaun liu husi Komunikadu ne’ebé Online INDEPENDENTE asesu iha Pajina SEFOPE, kuarta ne’e (08/01/25).

Xefe Departamentu mós husu ba familia sira atu nafatin suporta no apoio oan sira atu servisu ho diak, ho nune’e, labele prezudika maluk Timoroan sira ne’ebé hakarak ba mós servisu iha Australia.

Entretantu, traballadór na’in 32 ne’ebé atu ba servisu iha Australia kompostu husi mane na’in 12 no feto na’in 20.

Enkuantu, traballadór hirak ne’e sei ba servisu iha kompañia Strawberry Time.