Tuir komunikadu ne’ebé Online INDEPENDENTE asesu iha pájina Relasaun Públikas, katak, ekipa servisu halo vizilansia durante semana ida nia laran no konsege kamat suspeitu JMS alias Uben hamutuk ho evidensia iha liman laran, bainhira utilija hela motor na’ok ne’e iha estrada diresaun Taibesse, área Xina Rate nian.
“Hafoin halo inkeritu konsege identifika tan suspeitu nain rua seluk ne’ebé envolve iha kazu na’ok refere no ekipa servisu mós konsege buka to’o sira nia rezidénsia hodi foti suspeitu hamutuk ho evidensia kapasete rua (2) tan,”dehan Komunikadu ne’ebé Online INDEPENDENTE asesu, kuarta ne’e (08/01/25).
Suspeitu nain tolu ne’e ho naran inisial JMS alias Uben (17), JMM alias Aberek (19) ho suspeitu ida seluk ho naran SX alias Alelok (17) no sira na’in tolu hela hotu iha Aldeia Paiol, Suku Lahane Osidental, Postu-Administrativu Vera-Cruz, Munisipiu Dili.
Iha suspeitu JMS nia deklarasaun katak sira nain tolu rasik maka halo planu hodi naok ho inisiativa uza maneira sobu no dudu sai motor ne’ebé para hela iha Igreja Balide, bainhira vitima para hela motor hodi ba tuir misa Natal.
Hafoin naok motor sira mós konsege naok tan kapasete sarani sira nian hamutuk haat (4) ne’ebé xave hela ho motor iha estrada ninin maibé kapasete rua sira fa’an ona.
Entretantu, vitima Virgilio de Araujo Smith, hateten nia ba tuir misa kalan Natal nian iha Igreja Balide no para hela motor iha estrada ninin, besik estasaun kombustivel kompanhia Eto nian, hafoin misa remata vitima sai mai buka motor ema na’ok ona.
Biban ne’e, vitima Virgilio hato’o agradese ba servisu vizilansia komandu forsa rua tanba nia motor hetan fali inklui nia dokumentus importante seluk ne’ebe rai hela iha motor laran no husu atu kontinua buka tan motor seluk ne’ebé lakon no seidauk hetan to’o agora.
Ho deklarasaun husi suspeitu sira no mós vitima, Komandante SIPN hatun ona diretiva ba ekipa servisu hodi intensifika buka tuir autor sira seluk ne’ebé ho grupu oi-oin ne’ebé envolve iha kazu naok motor iha kapital Dili no mós munisipiu seluk.
Enkuantu, oras ne’e daudaun Xefi Ekipa servisu entrega ona Suspeitu nain tolu (3), evidensia motor ida (1), kapaseti rua (2) ba Departamentu Investigasaun Kriminal Nasional (DIKN), hodi halo prosesu investigasaun no detein durante oras 72, tuir lei ne’ebe iha, antes submete ba tribunal hodi tuir prosesu julgamentu.
