Primeiru-Ministru husu ne’e ihá ámbitu divulgasaun Dekretu-Lei kona-bá ezekusaun OJE 2025, bá klasifikasaun orsamentál no mapa kontabilidade 2025 bá Ministériu ho instituisaun Estadu hotu-hotu, ne’ebé organiza husi Ministériu Finansas (MF) liu husi Diresaun Jerál Tezouru, iha salaun MF, Aitarak-laran, tersa (07/01/2025).
“Hotu-hotu hatene, osan povu nian jere ho di’ak. Signifika, saida de’it mak ita halo tenke fó benifisiu bá povu,”dehan Xefe Governu liu husi komunikadu ne’ebé Online INDEPENDENTE asesu, tersa (07/01/25).
Xanana Gusmão subliña, bainhira Estadu ida jere orsamentu la di'ak, maka ema sei temi Estadu frázil, signifika instituisaun Estadu la'o la tuir regras. Tanba ne’e, papél husi responsável entidade Estadu sira nian maka asegura despeza públika ne’ebé gasta tuir regras, dalan no Lei.
Iha oportunidade ne’e, jestór entidade Estadu sira liu-liu sira ne’ebé iha área jestaun finansas públikas atende desiminasaun ne’e no simu idak-idak nia pakote aprovadu 2025 molok tama bá prosesu ezekusaun.
Aleinde hetan pakote OJE promulgadu bá entidade orsamentál hotu-hotu, iha ámbitu ne’e divulga mós informasaun kona-bá regras no prosedimentu ne'ebé sei iha ezekusaun orsamentu ne'e no ofisialmente loke sistema Government Resource Planning (GRP) free balance hodi permite hahú ezekuasaun iha tinan 2025.
Entretantu, proposta OJE 2025 ho montante Billiaun $2.6 ne’ebé IX Governu Konstitusionál aprezenta ho Lema “Investimento em infraestrutura estratégicas, reforço da economia e melhoria do bem-estar dos cidadãos”, Parlamentu Nasionál (PN), aprova iha finál globál iha loron 20, fulan-novembru 2024, ho votus 42 a favór, 23 kontra no 0 abstensaun.
Ho nune’e, Prezidente Repúblika, José Ramos-Horta promulga Lei n. 8/2024, loron 26 fulan-novembru tinan 2024, kona-bá OJE 2025 iha loron 25 fulan-novembru, ne’ebé publika ona iha Jornál Repúblika.
Enkuantu, orsamentu ho totál billaun $2,617, reprezenta kompromisu Governu Konstitusionál IX nian hodi fó prioridade bá investimentu infraestrutura estratéjika, promosaun kresimentu ekonómiku no hadi’a sidadaun sira-nia moris.
