Observasaun diáriu ne’e nian iha terrenu, karreta Prado ne’ebé deputadu sira uza balun la uza ona xapa matríkula mean ne’ebé hakerek MP (Membru Parlamentu), maibé privatiza ona hodi uza ona xapa matríkula mutin ka privadu nian.
Sosiedade Timor kestiona makaas desizaun Parlamentu Nasionál nian hodi privatiza karreta luxu Estadu nian ne’ebé folin rihun $63 ho presu ki’ik ka rihun $8. Maski nune’e, deputadu sira ne’e la sente ‘makili’ hodi kontinua nafatin desizaun ne’ebé sira halo ona.
Desizaun ne’e hamosu asaun boot husi estudante no juventude sira tanba konsidera deputadu sira halo lei hodi fasilita sira nia-aan halo korrupsaun legál.
Entretantu, iha parte seluk Prezidente Parlamentu Nasionál, Adérito Hugo da Costa hateten, Konsellu Administrasaun halo halo re-ajustamentu haree ba valór leilaun ne’e tun liu ka sa’e liu, maibé prosesu sira ne’e seidauk define tanba sei la’o hela.
Tanba ne’e, husu ba povu Timor tomak atu pasiénsia fó oportunidade ba tékniku administrasaun PN atu bele hala’o servisu hodi halo elaborasaun ba prosesu administrasaun tomak ne'ebé sei la’o hela.
“Ha'u labele ko’alia antisipadamente tanba desizaun ne'ebé mai ho kalkulasaun ne'ebé iha razaun, maibé ha'u nia despaxu nafatin klaru katak atu halo kontajen para ita atu haree took osan $8 husi ne’ebé”, dehan nia, iha Uma Fukun PN, horisehik.
Nia husu ba públiku atu tetu kona-ba jestaun manutensaun husi governu ba karreta administrasaun no ba karreta sira ne'ebé nia manutensaun mais metade husi ema sira ne'ebé ho kargu polítiku sira uza, tanba haree husi buat rua ne’e iha diferente.
Tanba ne’e, konsellu administrasaun halo hela kalkulasaun ba valór depresiasaun 100% manutensaun mai husi Estadu no haree ba valór depresiasaun manutensaun ba ema sira ne'ebé halo mais metade ne’e oinsá, tanba ne’e folin karreta ne’e deside tuir kalkulasaun sira ne’e.
Adérito hatutan, ezijénsia no kritika sira ne'ebé estudante no povu Timor halo liu husi karta eskrita PN respeitu no agora daudaun ne’e prosesu administrasaun sei la’o hela, tanba Parlamentu Nasionál halo desizaun la'ós individuál maibé kolejiál husi lider bankada haat ne'ebé eziste iha PN liu husi konsellu administrasaun.
Nia hatutan, iha loron (18/8) kuandu Parlamentu Nasionál simu karta petisaun, husu kedas ba Konsellu Administrasaun atu haree teknikamente ba desizaun atu reformula medida ne'ebé toma ona ba kalkulasaun folin depresiasaun ba karreta ne'ebé uza ona.
“Medida sira ne’e la’o hela ha'u rasik halo despaxu ida ba medida administrasaun atu haree karik presiza ajusta regra ruma. Ne'ebé sei la’o hela tanba ita hotu hatene III Lejizlatura besik atu remata ona nia mandatu”, dehan nia.
Nia dehan, Parlamentu Nasionál apresia ba povu nia espresaun liu husi manifestasaun, tanba nasaun ne’e garante liberdade direitu no espresaun.
Manifestante sira nia petisaun eskrita hatama ona iha meza Parlamentu Nasionál sira nia ezijénsia tama hotu ona iha karta petisaun ne’e, maibé sira hakarak halo nafatin manifestasaun.
