“O meu irmão, Taur Matan Ruak, por esse dia 10-10-2017 desejo lhe parabéns, longa vida e votos de muitas felicidade para si e sua família. Do seu irmão, Kay Rala Xanana Gusmão e família,” mensajen Xanana iha aniversáriu Taur Matan Ruak ba dala 61 ne’ebé selebra iha Casa Cidadania Kolmera Dili, Tersa ( 10/10).

Alende hato’o mensajen, Xanana mós fó oferta ‘cake’ ho sampana no ai-funan ba Taur Matan Ruak.

Mensajen Xanana Gusmão nian ne’e hato’o direta husi Sekretáriu Jerál Partidu CNRT, Francisco Kalbuadi Lay hamutuk ho lideransa kuadru polítiku CNRT nian tomak.

Iha semana kotuk, Xanana Gusmão iha rai liur hala’o ona kontaktu direta ho Taur via telefone, hodi ko’alia di'ak ba malu hafoin mosu lia-naksalak dezde tinan 2015 liubá.

Antes ne’e, iha fulan Juñu liubá, Prezidente partidu CNRT, Kay Rala Xanana Gusmão, nega Taur Matan Ruak nu’udar ninia alin. Tanba hanoin hikas deklarasaun ne’ebé antes ne’e Taur hato'o iha Parlamentu Nasionál hodi kait Xanana ho Soeharto, Eis-Prezidente Repúblika Indonézia.

“Lae ha'u Soeharto Timor. Ha'u la’ós Taur nia maun”, dehan Xanana.

Maski Xanana rasik nega ona Taur nu’udar nia alin. Maibé Taur Matan Ruak rasik la tau ba ódiu vingansa.

Ida ne’e hatudu, bainhira Taur simu mensajen no ‘cake’ husi Xanana, ho oin midar no hamnasa Taur hato’o sentidu agradesimentu ba nia maun Xanana.

“Ha’u agradese ba maun nia mensajen”, dehan Taur ho lian badak hodi kontinua ko'a ‘cake’ ne’ebé oferese husi Xanana.

Sekretáriu Jerál CNRT, Francisco Kalbuadi dehan, mensajen ne’e hato’o direita husi Prezidente CNRT Xanana ba ninia-alin Taur no família sira.

Serimónia aniversáriu eis-Prezidente Repúblika, Taur Matan Ruak, hala'o hamutuk ho inaugurasaun rezidénsia Casa Cidadania, Kolmera-Dili, hetan partisipasaun husi Xefe Bankada FRETILIN, Francisco Branco, Prezidente Partidu PD, Mariano ‘Assanami’ Sabino, Prezidente KHUNTO, Anaberta Santa, inklui reprezentante sosiedade sivíl no korpu diplomátiku.