Primeiru Ministru Xanana konsidera eskritóriu ne’e, reprezenta pasu signifikativu bá grupu g7+, serve hanesan sentru bá promosaun prioridade sira nasaun membru g7+ iha nível mundiál.
“Inisiativa ne’e refleta kompromisu g7+ nu'udár ajente promosaun bá pás, hodi apoia resposta ONU bá nesesidade no aspirasaun membru Estadu g7+ hodi atinji pás no dezenvolvimentu sustentável,” dehan Xefe Governu liu husi Komunikadu ne'ebé Online INDEPEDENTE Sita iha GPM, Segunda (23/09/2024).
Komunikandu haktuir, Timor-Leste nu’udár país foun, orgullu lidera organizasaun g7+ ne’ebé halibur nasaun frázil no pos-konflitu hamutuk 20 hosi Afrika, Azia, Mediu Oriente no Pasifiku.
Tanba ne'e, g7+ servisu maka’as atu apoia no reprezenta país sira no mos halo atu mundu rona país hotu nia lian.
Dadaun ne'e, g7+ nia estatutu hanesan observador iha ONU, ne’ebé fó dalan bá nia atu aprezenta perspetiva koletiva ida kona-bá ajenda no servisu ONU nian. g7+ defende papel ida ne’ebé ativu liu iha Nasaun Unidas hodi promove reziliénsia no estabilidade estadu sira nian.
Misaun seluk estabelese grupu g7+ maka harii dame no harii estadu (peacebuilding and statebuilding) iha Timor-Leste rasik hasoru dezafiu oin-oin, maibé Timor-Leste iha vontade hakarak fahe esperiénsia ba nasaun frájil sira bo’ot tebes.
"Ho misaun hirak ne’e, IX Governu Konstitusionál define ona Timor-Leste nia polítika esterna ho prinsípiu ida-ne’ebe konsagra sentidu independensia no soberania mak: “Ba Timor-Leste, Laiha Aliadu ka Inimigu, Hotu-Hotu sei Hamutuk no amigus de’it!”. Ida ne’e sai hanesan Timor, ita-nia Lema, ne’ebé sei orienta ita iha Relasoens Esternas, iha Konjuntura Internasional ida ne’ebe daudaun ne’e defisil tebes," haktuir komunikadu.
Timor-Leste sauda ba País Rejiaun hotu-hotu, ne’ebé fó ona apoiu internasional iha aspetu oioin, hodi reforsa relasoens di’ak ho Australia, Indonézia, Nova Zelandia, Xina, Japaun, Koreia Súl, no país membru ASEAN sira seluk.
Timor-Leste mos hakarak sauda ka simu ho di’ak relasaun amizade no solidariedade País sira hanesan Portugál, Brazíl, no komunidade país PALOP, Kuba, Reinu Unidu, Irlanda, no Estadus Unidos Amerika, nune’e mós ba Organizasaun Internasionál sira, liu-liu ONU no ninia Ajénsia, Banku Mundiál, Fundu Monetáriu Internasionál no Banku Aziatiku Dezenvolvimentu, no Governu hakarak reforsa lasu asistensia teknika no profisional, ne’ebe Timor presiza hodi kumpre IX Governu nia misaun bá povu no nasaun.
Enkuantu, nasaun sira ne’ebé sai membru g7+ mak hanesan, Repúblika Izlámika Afghanistaun, Repúblika Burundi, Repúblika Sentrál Áfrika, Repúblika Chad, Uniaun Comoros, Repúblika Cote d’Ivoire, Repúblika Demokrátika Congo, Repúblika Guinee, Repúblika Guinea-Bissau, Repúblika Haiti, Repúblika Liberia, Papua Nova Guinea, São Tome e Príncipe, Repúblika Sierra Leone, Solomon Islands, Repúblika Federál Somalia, Republika Sudaun Súl, Repúblika Demokrátika Timor-Leste, Repúblika Togolese, no Repúblika Yemen.
