Xefe Gabinete Relasaun Externa No Komunikasaun, Cesário Da Silva Marques hatete, tuir dadus ne’ebé APC rejista, total komunidade ne’ebé afeitadu ba dezastre naturais hahú husi Janeiru to’o Setembro hamutuk 3.042 iha teritoriu laran tomak.
Maibé husi númeru ne’e, vítima uma kain 3.012 mak hetan ona apoiu emerjensia no uma kain 31 seidauk hetan apoiu emerjensia.
“Komesa iha fulan Janeiru to’o Setembro, ami rejista iha ne’ebá komesa husi Aileu to’o mai iha RAEOA, iha ne’ebá simu ona materia rekonstrusaun hanesan apoiu emerjensia ne’e hamutuk 3.012, ida ne’ebé seidauk simu apoiu emerjénsia ne’e uma kain 31, tanba presiza dadus konkreta ida hafoin ita halo apoiu ba iha ne’ebá,” dehan Xefe Gabinete iha Salaun APC Kaikoli, Segunda (23/09).
Xefe gabinete afirma, ba vitima sira ne’ebé seidauk hetan apoiu emerjensia ho razaun katak vitima hirak ne’e hela liu iha area rurais tanba ne’e trasporta labele liu hodi transporta sasan sira ne’ebé atu apoiu ba vitima sira.
Maibé iha mos razaun seluk katak dadus hirak ne’e seidauk loos, tanba dadus sira ne’e mos balun simu husi via telefone de’it tanba ne’e persiza verifika fila-fali hafoin fó apoiu ruma.
“Agora hein dadus de’it, bainhira dadus iha, bainhira ita seidauk identifika lolos sé mak ne’e, se ita mai mak liu husi via telefone de’it, tanba ami mos iha diresaun ida naran relasaun externa no komunikasaun ami-nia moto ida katak hakarak divulga informasaun ne’ebé loos halo ema fiar entaun dadus ne’e mos tenke los ita labele simu liuhusi via telefone mais ita tenki to’o iha terenu tebes duni ka lae,” katak Xefe Gabinete.
Enkuantu, husi dadus 31 ne’ebé seidauk hetan ápoiu emerjensia kompostu husi Munisipiu Baukau uma ka’in 27, Dili rua, Lautem ida no Ataúro ida.
Entertantu, husi dadus 3.012, ne’ebé hetan ona apoiu emerjensia kompostu husi Munispiu Aileu 33, Ainaro 185, Atauru 28, Baucau 207, Bobonaro 133, Covalima 618, Dili 396, Ermera 258, Likisa 217, Lautem 69, Manatuto 259, Manufahi 174, Vikeke 120 no RAEOA 315.
Aliende, Autoridade Protesaun sivil mos rejistu ema ne’ebé lakon vida durante fulan sia nia laran hamutuk na’in 29 no hetan kanek 44.
