Tuir komunikadu ne’ebé Online INDEPENDENTE asesu, Estónia nu’udár nasaun dezenvolvidu ida ne’ebé hola parte iha zona Europeia no konsege alkansa ukun rasik-an iha tinan 1918.
Tanba Estónia iha problema polítika, ne’ebé Uni-Soviet mak ukun sira durante tinan barak, nune’e iha loron 20 Agostu 1991 foin hetan ukun rasik an. Nasaun ne’e iha ninia totál populasaun hamutuk 1.331.796.
Enkontru istóriku entre Prezidente Repúblika Estónia ho Xefe Govenu Timor-Leste marka inísiu parseria ida ne'ebé promisór tebes.
Iha enkontru bá dala uluk entre líder na’in-rua ne’ebé konsege hakle’an diskusaun kona-bá kondisaun reál dezenvolvimentu nasaun ida-idak nian, liu-liu fahe mós istória kona-bá luta bá independénsia.
“Hasoru-malu ne’e, partikularmente signifikativu tebes, haree bá Timor-Leste nia viajen rasik dezde hetan independénsia iha tinan 2002. Nune’e, líder na’in-rua ne’e mós diskute kona-bá planu bá futuru dezenvolvimentu ekonómiku no kooperasaun potensiál sira,” Online INDEPENDENTE sita iha Komunikandu, (23/09).
Tuir komunikandu ne’e haktuir, Estónia iha esperiénsia barak kona-bá Governu eletróniku no infraestrutura dijitál, bele oferese matenek ne’ebé iha valór bá Timor-Leste, buka atu diversifika ekonomia liu-fali petróleu no gás.
Durante hasoru-malu, líder na’in-rua ko’alia mós kona-bá direitus umanus no Estónia husu apoiu hosi Timor-Leste bá sira-nia kandidatura bá Konsellu Direitus Umanus ONU nian.
Asuntu ida-ne’e, aliña ho Timor-Leste nia kompromisu rasik bá direitus umanus ne’ebé hatudu hosi sira-nia partisipasaun iha organizasaun internasionál sira hanesan ONU, ASEAN, no Komunidade País sira ho Lian Portugés (CPLP).
Iha biban ne’e, Xefe Estadu Estónia hato'o konvite ida bá Prezidente Repúblika, José Ramos-Horta atu partisipa eventu internasionál ida iha Estónia hahú loron 19 to’o 20, fulan-Outubru 2024.
