Xefe Suku Gariuai, Arlindo Belo Freitas informa, uma-lisan 12 ne’ebé ahi haan ne’e pretense ba knuar Guileu, Kai-ono no Berkoli.
"Uma lisan 12 iha hotu foho leten mak ahi haan mutuk hotu. Agora ita atu duun ba ema mak sunu mós la di'ak, ida ne'e dezastre ita la espera, maibé ekipa Protesaun Sivil agora halo ona levantamentu dadus hodi hatene nia motivu loloos," informa Xefe Suku ne’e ba Jornal INDEPENDENTE via telefone, Tersa (24/09).
Tuir informasaun provizoriu, Arlindo dehan, deskonfia ahi mai husi ahi-anar husi akar ne’ebé komunidade balun sunu iha loron haat liu ba.
“Tuir informasaun ne'ebé komunidade sira ko'alia, antes loron haat ne'e akar ida maran tohar iha rai huun to'o laran, depois sira sunu lakan seidauk mate, entaun ida ne'e mak sira deskonfia anin lori ahi anar ba uma lisan,” nia konta.
Hafoin dezastre ne’e, ekipa husi Autoridade Protesaun Sivil munisipiu Baukau no Ministériu Solidariedade Sosial no Inkluzaun to’o ona iha fatin hodi fó apoiu emerjensia.
Iha fatin ketak, Sekretáriu Estadu Protesaun Sivíl (SEPS), Domingos Mariano Reis informa, vitima sira husi dezastre ne’e hetan ona apoiu emerjensia.
“Horseik (horibainrua) akontese ahi haan mutuk uma-lisan 12 iha suku Gariuai, Munisípiu Baukau, ita-nia ekipa tuun kedas iha kalan ne'e apoiu kedas emerjensia ba ita-nia vitima sira," dehan nia.
Kona-ba kauza, nia dehan, ekipa iha terenu halo hela investigasaun hodi hatene ninia motivu.
"Agora atu teknikamente atu esplika ida ne'e ekipa sira sei iha tereinu halo servisu depois mak sira relata, maibé apoiu emerjensia ita oferese ona ba vitima sira," dehan Sekretariu Estadu ne’e.
