Tanba ne’e, Deputada Maria Rangel hatete, tuir informasaun ne’ebé nia rona husi tekniku sira katak, prosesu dezenvolvimentu Greater Sunrise ne’e estudu laiha, agora mak atu halo fali estudu foun. Nune’e, Deputada Maria konsidera PM Xanana partidariza deit Fronteira Maritima.
“Agora ha’u foin hatene katak estudus laiha, maibé foin halo fali estudus foun, koalia ba kestaun estadu, maibé haluha tiha katak iha progresu diskusaun negosiasaun fronteira maritima, Primeiru Ministru mai la hato’o iha Parlamentu Nasional, partidariza lori ba partidu ne’ebé PM adere ba”, dehan Deputada Maria Angelica Rangel.
Ho nune’e, iha intervensaun Deputada nian, halo Xefe Governu hirus hodi hiit liman husu defeza de onra katak, Mari Alkatiri partisipa iha Konselhu Fronteira Maritima, “De vez em quando ami sai mai ami informa beibeik, ne’ebé eis Primeiru Ministru Rui Maria de Araújo hatene kona ba kestaun ne’e, tanba ne’e labele dehan ha’u partidariza, ne’e la hatene, estupida,” Xanana hatete ho lian makaas.
Enkuantu, Deputada Maria Angelica Rangel mós simu kedas PM xanana nia liafuan hatete, iha parlamentu ne’e orgaun seberanu, tanba ne’e labele trata ho liafuan la diak, tenki respeita, labele trata ema.
Hatan hikas ba kestaun ne’e, PM Xanana hatete, sala tanba dehan ha’u partidariza Fronterira Maritima, ha’u la lori ba ha’u nia partidu, momentu ne’ebá Mari Alkatiri ho eis PM Rui Maria Araújo akompaña, FRETILIN mak kaer ha’u nia Governu, ha’u sai husi ne’ebá”, hakilar Xanana.
Tuir Xanana, bainhira lori mai iha Parlamentu Nasional, tanba sá mak FRETILIN sai, la vota kontra maibé sai, ida ne’e imperializmu inimigos dos povos ne’e mak hakruk ba imperialista.
Tuir observasaun husi Online INDEPENDENTE nota katak, situasaun ne’e konsege halo Parlamentu Nasional hanesan ‘Merkadu’, tanba komesa hakilar malu entre deputadu sira husi bankada Governu no opozisaun.
Tan ne’e, Prezidente Parlamentu Nasional, Maria Fernanda Lay hapara kedas situasaun ne’e, husu deskulpa hodi hapara lai diskusaun OJE ne’e, tanba koalia la intende malu, nune’e fó tempu ba intervallu.
Entretantu, rekorda katak, iha loron 11 fulan-Dezembru 2023, Reprezentante Espesial Australia Esteves Barcks hala’o enkontru ho Primeiru Ministru Kay Rala Xanana Gusmão no Ministru Petroleo Rekursu no Minarais, Francisco da Costa Monteiro hodi ko’alia kona ba progresu dezenvolvimentu greater sunrise ne’ebé la’o dadauk ona, no sira mós konkorda hodi halo estudu viabilidade foun ba prosesu dezenvolvimentu greater sunrise.
