PM Xanana hasai lia-fuan stupida ba deputada bankada Fretilin ne’e tanba PM la simu deputada ne’e hatete nia partidariza Greater Sunrise.
Deputada Maria hahú ninia intervensaun ho kritika ba governu dasia ne’ebé lidera husi PM Xanana.
Deputada ne’e dehan, PM Xanana ne’ebé lidera Governu dasia laiha politika atu tau orsamentu ba fundu infra-estrutura, maibé mai ho hanoin atu halo auditoria, re-avaliasaun, no koresaun ba planu infra-estrutura.
Tuir nia, tuir loloos Governu ida ukun la'os atu mai sobu, maibé atu kompleta malu.
“Señor primeiru ministru, karik hakarak julga ba ukun, haree fali governu sira liu ba gasta orsamentu montante barak. Governu sira uluk gasta orsamentu jeral estadu ba projeitu estrada Suia $33 millaun, kualidade laiha, aero-portu Suia gasta orsamentu maibé aviaun hira mak tuun ona? Betano kimika planta halo ona kompesesaun ba rai ba $10 millaun oinsa ona?.”
Iha Governasaun uluk, nia dehan, gasta orsamentu kuaze millaun $1.40 ba uma MDG’s maibé laiha kualidade.
"Agora iha balun husu tenke preokupa kona-ba proposta OJE 2024, ami preokupa tanba labele pasa surat mutin ba governu, maibé ezerse funsaun ho didi’ak hodi evita jogus iha loron ikus tanba iha impaktu direitu moris ba povu no nasaun," nia dehan.
Deputada ne’e koalia mós kona-ba diskursu PM Xanana iha debate OJE 2024 iha númeru ualu katak, oitavo Governu halo estimasaun ka hapara tiha esforsu hotu-hotu atu alkansa no atu elabora akordu ida kona-ba dezenvolvimentu Greater Sunrise.
"Afinal ohin ha'u rona husi deputada Cristina koalia kona-ba tekniku no politika ne'ebé mak hasoru Greater Sunrise nian, bainhira loos mak mai no sei halo fali estudu foun ba viabilidade ekonomia no komersial, afinal ha'u foin hatene estudu laiha no sei halo fali estudu foun."
"Primeiru Ministru mós dehan katak kestaun estadu nian maibé Primeiru Ministru mós haluha katak prosesu diskusaun negosiasaun fronteia maritima, maibé Primeiru Ministru la mai hato'o iha parlamentu nasional, maibé partidariza lori ba partidu ne'ebé ita-boot adere ba," katak nia.
Hatan ba kestaun ne'e, PM Xanana hatete, iha prosesu negosiasaun ne'e Sekretariu Jeral Fretilin Mari Alkatiri partisipa hotu iha konsellu fronteiria maritima.
"Ha'u-nia defeza onra, senor Mari Alkatiri partisipa hotu iha konselu fronteira maritimas no kada ves ami sai mai, ami informa bebeik ba, eis Primeiru Ministru Rui Maria de Araujo hatene ida ne'e, labele dehan partidariza. stupida, stupida," dehan Xanana.
Lia-fuan stupida halo depuada Maria la satisfas, tanba tuir deputada Fretelin ne'e PM Xanana la merese intervensaun deputada nian.
"Iha ne'e orgaun ida ita-boot la merese trata ema stupida, iha ne'e orgaun ida ita-boot tenke respeitu tanba realidade mak ida ne'e, tanba ita-boot labele koalia deputada dehan stupida, labele koalia iha ne'e, ha'u deputada, ita-boot tenke respeitu, se hakarak ema respeitu ita tenke respeitu uluk."
"Ha'u koalia nu'udar deputada oposizaun, se ita-boot sala kuandu deputada stupidu," Maria hakilar ho lian maka'as ba PM
Mosu diskusaun entre PM Xanana ho deputada Maria.
“Dehan ha'u partidariza fronteira maritima,” PM Xanana dehan.
Deputada Maria hataan: “Sim, tanba dehan lori ba partidu ita-bo'ot adere ba.”
“Ha'u la lori ba ida. Señor Mari Alkatiri akompanna, señor Rui Araujo akompaña. Fretilin mak uluk kaer ha'u-nia Governu, ha'u sai husi ne'ebá, stupida," Xanana hatan ho lian maka'as.
Ho nune'e situasaun sai manas liu tan no haksesuk malu tanba deputada Fretilin ne'e la simu ho lia-fuan stupidu husi PM Xanana, no sai nervozu liu tan ho ho partisipante no deputadu balun ne’ebé basa liman ho PM Xanana nia lia-fuan.
"Ita-bo'ot sira basa-liman ne'e mak stupidu hanesan ho ida koalia ne'e, ha'u koalia buat ne'ebé loos, defende povu, kuandu ha'u koalia ida ne'e, iha ema barak hakarak tiru ha'u-nia ulun, ha'u sei la tauk atu koalia nafatin," dehan Maria.
Tuir observasaun jornalista jornal INDEPENDENTE nota katak, dezentendimentu ne'e halo Parlamentu Nasional sai runggu-rangga tanba deputada husi bankada Fretilin no CNRT idaidak halo auto-defeza no kritika no hakilar malu.
Iha parte li’ur, deputadu bankada Fretilin no CNRT sira diskute malu hodi hatun malu no ikus mai polisia deside hakalma situasaun.
Maske nune’e, iha diskusaun parte lokraik, PM Xanana deside hodi husu deskulpa ba deputada bankada Fretilin.
"Ha'u husu deskulpa ba povu tomak no deputada ne'e tanba ho hahalok ne'e sai dezentendimentu, tuir loloos ha'u nonok karik buat ne'e la akontese, ne'ebé ha'u mak beik, ha'u husu deskulpa," dehan Xanana.
