Tuir Komunikandu ne’ebé INEDEPEDENTE Online asesu, Primeiru-Ministru husu atu respeita-malu no hadomi-malu durante jogu ne’e la’o, nune’e fó ezemplu bá fatin barak ne’ebé sei funu hela rezulta ema barak terus no mate.
“Ha’u felisita imi tanba iha tinan 2023 hala’o tiha ona Xanana Cup iha UK la’o ho di’ak. Agora imi atu hala’o tán dala-ida iha tinan 2024, prinsípiu Xanana Cup maka The Power of football is to bring people together meet new friends, enjoy life, and have fun to build peace and unity. Ha’u felisita imi hodi organiza-an iha ekipa 8 kedan. Ha’u dezeza ekipa hotu-hotu joga ho di’ak, keta hirus-malu, keta tebe ain, keta tuku-malu,” Kay Rala Xanana Gusmão hateten iha mensajen ofisiál ne’ebé INDEPEDENTE online Asesu, Segunda (15/07).
Xanana Gusmão felisita espesiál bá Komisaun Organizadora iha UK no espera katak Timoroan sira joga di’ak, hatudu talentu no hatudu domin bá malu, haku’ak bo’ot ho domin tomak hosi Dili.
Prezidente Komisaun Organizadora Xanana Cup UK, Celso Ximenes Oliveira agradese bá Líder nasionál Kay Rala Xanana Gusmão ne’ebé hato’o ona mensajen nakonu ho motivasaun no domin.
“Lori komisaun organizadora hato’o agradese wa’in bá líder nasionál Kay Rala Xanana Gusmão bá lia-fuan motivasaun no domin. Ami kompromete sei hala’o jogu ne’e ho di’ak, hatudu unidade nu’udár Timoroan no kaer metin prinsipiu Xanana-Cup nian,” Celso Oliveira agradese.
Realizasaun Xanana Cup-UK ho objetivu atu halibur no hametin amizade Timoroan no atu prátika desportu hodi halo komunidade sira sai di’ak, sai forte no saudável.
Xanana Cup-UK dahuluk realiza iha sábadu 01 jullu 2023 ne’ebé partisipa hosi ekipa neen hosi sidade haat no halibur malu hodi tebe-bola iha sidade Peterborough.
Iha tinan 2024, Xanana Cup-UK hala’o ona iha loron sábadu, 13 fulan-Jullu ne’ebé partisipa hosi ekipa ualu (8), iha sidade Peterborough.
Ekipa Tebe-bola ualu ne’e mak, As Family FC hosi sidade Peterborough, Halibur FC, Dalas FC, Lakateu FC, Morisson FC, Latimer FC hosi sidade Latimer, Bradford FC, no Crocodile FC hosi sidade Cambridgeshire