Iha fulan Abril tinan ne’e nia laran, ekipa ne’ebé lidera husi SEATOU halo eviksaun ba komunidade sira. Hafoin eviksaun, vitima sira loke ona sira-nia konta bankaria hodi bele simu osan indinimizasaun.
Maibé, tama ona fulan tolu, osan indinimizasaun seidauk tama iha vitima sira-nia konta bankaria.
Deputadu Bankada Fretilin, Antonio Clau hateten, Bankada Fretilin fó apoiu tomak ba SEATOU nia servisu atu organiza no normaliza kapital Dili.
Maibé, deputada ne’e lamenta to’o ohin loron seidauk selu indiminizasaun ba vitima sira.
"Ha'u halo konfirmasaun ba ita-nia vitima sira iha Bidau Santana, Bidau Sengol, sira-nia rekening ne'e to’o agora osan seidauk tama, maske sira sai vitima tiha ona ba eviksaun ne'e," dehan deputadu ne’e iha plenaria PN, Tersa (16/07).
Nune'e, nia husu ba SEATOU atu halo klarifikasaun lalais tanba sa mak seidauk selu indiminizasaun ba populasaun sira.
"Bainhira loos mak sira sei hetan indiminizasaun? maske uitoan ka barak ne’e governu tenke konsidera no dignifika populasaun sira ne’e hanesan ema ne’ebé moris iha nia nasaun rasik," katak nia.
Iha fatin hanesan, deputadu Fretilin seluk, Antoninho Bianco mós lamenta ho politika governu ne'ebe obriga populasaun sira ne'ebé okupa rai estadu atu hamamuk fatin maibé la kria kondisaun ba sira.
"Eviksaun ne'ebé populasaun sira enfrenta iha Kapital Dili no mós fatin seluk ne'e agora daudaun populasaun sira halerik maka’as liu, tanba laiha uma ba sira atu hela ba, sira-nia oan eskola, lakon mós atividade ekonomiku sira ne’ebé bele sustenta sira-nia moris," deputadu ne'e dehan.
