Tuir Diretor Nasional World Vizion Timor-Leste, Migena Shulla hatete, World Vision iha Timor-Leste nudar organizasaun servisu ida ne’ebé atu haree no hadia situasaun labarik sira nian iha uma laran, komunidade no sosiadade.

Tanba ne’e, World Vizion Timor-Leste ho kontente intrega material eskola no material ijíne ba Komisaun hodi apoiu ba labarik sira.

“Ha'u kontenti tebes bele hasoru malu ho ita boot sira hotu iha dader kmanek ida ne'e, iha okajaun entrega apoio material eskola nian no mós material ijíene nian ba labarik sira ne’ebé hetan impaktu husi kalaminidade iha loron 4 fulan-Abril liu ba,”dehan nia liu husi diskursu iha edifisiu WVTL, segunda ohin (28/06).

Nia hatutan, material eskola no material ijíene ne’ebé oferese ba Komisaun Nasional Direitu Labarik mak hanesan, kadernu, lapizeira, kadernu pinta, maskara no sanitaizer.   

Tuir nia, Komisaun Nasional Direitu ba Labarik, nudar parseiro importante tebes ba World Vision hodi hala’o kolaborasaun iha aktividade ne’ebé relasiona ho labarik no mós parseiru servisu ida ne’ebé tau matan atu promove no proteze labarik sira hodi atinji sira nia mehi.

Tanba ne’e, ba oin World Vision iha komprimisu atu nafatin kontinua servisu hamutuk ho Komisaun Direitu ba Labarik atu haree ba situasaun no difikuldade ne’ebé labarik sira hasoru.

Nune’e, World Vizion iha komprimisu atu ba oin kontinua servisu hamutuk ho Komisaun Nasional Direitu Labarik atu hare ba situsaun labarik sira nian.

Entretantu, Komisaria Direitu Labarik, Dinorah Granadiero hatete, nia parte agradese ba World Vizion Timor-Leste ne’ebé apoiu ona material eskola no material ijíene ba labarik vitima inundasaun sira.

Nia hatutan, tuir pedidu ne’ebé Komisaun husu ba World Vizion, atu apoiu material ba labarik hamutuk 250.

“Normalmente ita fahe material sira ne’e kada pakote ba labarik ida,”dehan Komisaria.

Nia akresenta, tuir planu, material sira ne’e sei fahe ba labarik sira iha Dili laran, maibé posibilidade bele fahe mós ba munisipiu sira ne’ebé presiza. Nune’e, bele komunika mai iha Komisaun Nasional Direitu Labarik, atu bele fó apoiu.

Enkuantu, tuir dadus, labarik sira iha Dili ne’ebé sai vitima ba inundasaun foin lalais ne’e hamutuk 2000 resin.

Tuir Komisaria, sentru amijavel ne’ebé estabelese hodi akumula labarik vitima inundasaun sira iha Dili hamutuk 23, maibé maioria taka ona tanba komunidade reintrega fila ona ba sira nia hela fatin antes.

Iha sentru amijavel balun ne’ebé sei estabelese tanba komunidade rasik husu atu kontinua loke nafatin hodi bele apoiu labarik sira atu aprende.

Sentru amijavel ne’ebé sei estabelese ba labarik sira mak hanesan, Eis Óspital Lahane, eskola 4 de Setembru-UNAMENT Balide.

Asistente Editor: Saturnina da Costa