Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu foun ne’ebé relata ohin, iha Kapital Dili na’in 48, Baucau 2, Manatuto 1, Manufahi 1, RAEOA 2 no Vikeke 6.
“Total kazu detetadu foun ohin iha proporsaun kazu sintomatiku hamutuk pursentu 8,9 (8,9%),”dehan nia iha komunikadu, sabado ohin.
Nune’e, kazu rekuperadu hamutuk 122 no kazu ativu iha Sala Izolamentu hamutuk 812.
Enkuantu, total kazu komulativu konfirmadu sura husi loron 21 fulan-Marsu to’o loron 26 fulan-Juñu hamutuk 8,979.
“Kazu mate ne’ebé relata ohin, sidadun Timor-oan ho idade 32 hela iha Tasi-Tolu, suku Comoro, Postu Administrativu Don Aleixo,”tenik nia.
Matebian detetadu positivu iha loron 1 fulan-Juñu, nune’e iha loron 5 fulan-Juñu enkamiña husi Tasi-Tolu ba Vera Crus.
Matebian ho moras dignoze traballu sindroma insufisiénsia respiratória aguda (SIRA), ka susar/difisil atu dada-iis tanba Covid-19. Matebian hetan tratamentu tuir protokolu ne’ebé iha inklui tratamentu ho oksijéniu liuhusi non-rebreather mask, maibé horiseik (25/06) loraik oras 17:25 iis-kotu tanba respiratory failure no multiple organ failure.
Entretantu, familia kordena ona ho ekipa saúde atu hala’o funeral tuir protokolu ne’ebé adopta iha Timor-Leste, iha loron aban 27 juñu iha Atsabe, Ermera.
Husi horiseik (25/06) mai ohin teste PCR ne'ebé Laboratóriu Nasionál Saúde halo iha Dili hamutuk 651 kompostu husi, Vijilánsia sentinela 19, Contact tracing 6, Random Screening 20, Viájen sai husi serka sanitária husi Dili 590, Viájen internasionál 1 no Follow up iha kuarentena 15.
Totál testes PCR ne’ebé halo horiseik (25/06) iha Munisipiu sira seluk, RAEOA no HNGV hamutuk 373 ho detalle hanesan, Baucau 81, Ermera 71, Maliana 14, Maubisse 46, Suai 43, Vikeke 48, RAEOA 26 no HNGV 44.
Nune’e, ohin (26/06) izolamentu Vera Cruz halo tratamentu ba kazu detetadu na'in 12. Iha Obstetria 2 no medisina interna na’in 10.
Asistente Editor: Saturnina da Costa
