Objetivu prinsipal husi formasaun ida ne’e atu eleva manorin na’in sira nia koinesimentu kona-bá asuntu defisiensia nian liuliu oinsa atu husu sira inklui iha asuntu defisiensia nian, hodi assegura partisipasaun no envolvimentu ema ho defisiensia iha sentru formasaun ne’ebé sira iha.

Diretor Ezekutivu Assosiasaun Defisiensia Timor-Leste (ADTL) Cesário da Silva hatete, formasaun ne’e ADLT ho Raes Hadomi Timor-Oan (RHTO) hetan apoiu husi Workforse Development Program Timor-Leste (WDPTL) no SEFOPE.

“Formasaun ida hala’o bazeia ba deskobrementu ne’ebé ami halo iha fulan-Marsu tinan ne’e, ami halo asesmentu ida ba 0rganizasaun membru sira iha sentru formasaun 13 ne’ebé ami ba vizita,”dehan nia iha salaun ADTL, Maskarenhas Balide Dili, segunda ohin (28/06).

Nune’e, ADTL deskobre katak, sira nia koñesementu ba iha asuntu defisiensian nian mak menus.

Tanba ne’e, ADTL ho RHTO halo kordenasaun ho WDPTL hodi realiza formasaun ida ne’e.

"Iha formasaun ida ne’e, ohin sentru formasaun neen (6) iha Dili laran mak mai partisip no kada sentru formasaun ida ema na’in rua mak partisipa formasaun,"tenik nia.

Nia informa, tuir lolos sentru formasaun 13 mak tuir formasaun maibé ho situasaun pandemia Covid-19, nune’e sira realiza uluk sentru formasaun 6 iha Kapital Dili.

Aleinde, husi formasaun ne’e mós sei dezeña planu ba oin, sentru formasaun sira, oinsa atu bele integra ema ho defisiensia iha formasaun iha sira nia fatin.

Tuir nia, materia ne’ebé manorin na’in sira simu iha formasaun ne’e mak hanesan, materia baziku liu-liu introdusaun ba asuntu defisiensia baziku no mós materia dezeña planu asaun ba oin iha sentru formasaun ida-idak.

Entretantu, Diretor Nasional formasaun professional,  Mateus Alfredo dos Santos, hatete, formasaun ne’e ba manorin na’in sira husi sentru formasaun 6, atu oinsa bele prepara rekursu umanu iha sentru formasaun atu bele akumula ema ho defisiensia iha sentru formasaun

“Formasaun ida ne’e ba ita nia manorin na’in sira husi sentru formasaun 6, atu nune’e oinsa mak ita prepara rekursus umanus ba formasaun ida ne’e, atu bele akumula mós ita nia maluk ema ho defisiensia sira, atu  partisipa iha formasaun ne’e rasik,” dehan nia.

Nia relata, Sentru formasaun 6 ba ema ho defisiensia iha Kapital Dili mak hanesan Sentru Treinamentu Juventude, Dom Bosco, Vizaun foinsa’e, Bekora, Tibar no seluk tan.

Enkuantu, tuir dadus husi SEFOPE, sentru formasaun ba ema ho defisiensia iha teritoriu laran tomak hamutuk 15.

Asistente Editor: Saturnina da Costa