Prezidente Fundasaun An-Nur Dili, Mohammad Anwar da Costa hatete, Amu Papa Francisco la’os de’it lideransa espiritual Katolika nian, maibé nu’udar mós figura ba paz, unidade no toleransia ba mundu.

Nia dehan, fraterniadade umana ne’ebé Timor-Leste mós opta ne’e Amu Papa asina hamutuk ho Grande Imam Alajar Ahmat.

“Iha Timor ne'e maioria ema Katolika maibé Amu Papa mai laos haree de'it nia komunidade Katolika maibé haree mós komunidade hotu-hotu,” dehan nia.

Iha Amu Papa ninia vizita, Mohammad dehan, nia parte mós hetan konvite atu hasoru-malu ho Amu Papa.

Iha fatin ketak, Padre Igreja Protestante, Adão Baptista Gomes hatete, Amu Papa nu’udar na’i-ulun mundiál ne'ebé sei lori paz no inspirasaun foun ba povu Timor-Leste tomak.

"Ita hotu kontente katak liu husi ninia vizita ne'e bele lori inspirasaun foun mai rai Timor, liu-liu haree ba fiar hatudu katak ita Timor ne'e ita fiar duni Maromak kristianizmu," dehan Adão iha nia knaar fatin, Vila Verde, Kinta (08/08).

Liu husi Amu Papa nia vizita ne’e, bele hametin di'ak liu tan Timor-oan hotu nia fiar hodi lao tuir Biblia ne’ebé nu’udar mada-dalan sagrada.

“Espera katak bainhira Amu Papa mai fiar Kristaun iha Timor bele metin liu tan. Tanba Amu Papa ne'e lideransa igreja nian no espera rai Timor-Leste bele iha paz, unidade, toleransia, fraternal, ne'ebé Amu Papa rasik mak kria bele sai di'ak liu iha futuru,” dehan nia.