Vise Ministru Asuntu Parlamentar (MAP), Aderito Hugo da Costa hateten, reuniaun lider bankada, iha Kinta (8/8), horisehik, atu aserta eventu nasional ba selebrasaun loron Konsulta Popular 30 Agostu nian.
Nia haktuir, dadauk ne'e deputadu sira hala'o hela feriadu resesu durante fulan rua ne'ebe mak hahú ona husi 16 Jullu to'o 16 Setembru 2024. Maibe mesmu resesu Prezidente Parlamentu Nasional no Komisaun permanente bele realiza plenaria extraordinariu ba deputadu sira.
"Ita hotu hatene, selebrasaun ne'e monu iha loron resesu Parlamentu Nasional nian, maski resesu prezidente ho komisaun permanente bele konvokatoriu plenária extraordinariu. Ne'ebe ohin aprezenta ona sekuensia sira ba plenaria solene iha loron 30 Agostu nu'udar ajenda nasional bá selebarasaun tinan 25 refendum", nia esplika.
Governante ne’e hatutan, selebarasaun bá loron konsulta popular ne’e hala'o iha territoriu nasional no Membru Governu (MG) ho responsavel lina ministerial sira hotu bá selebra hamutuk iha nivel postu administrativu sira tomak.
Tanba, Parlamentu Nasional resesu hela, tan komisaun organizadora sei organiza hodi deputadu sira partisipa selebarasaun loron nasional ne’e iha nível postu sira iha Dili de'it, tanba iha loron 30 Agostu deputadu sira hotu sei partisipa sesaun plenaria solene.
Nia akresenta, Membru Governu sira mak destaka postu administrativu sira no sei kompleta tan ho diretor Jerál sira, tanba iha territoriu nasional postu administrativu hamutuk 67, entaun MG la to'o.
Nia dehan, Primeiru Ministru Kay Rala Xanana Gusmão fó ona orientasaun bá MG sira atu destaka bá Postu Administrativu iha Munisipiu sira hodi selebra tinan 25 Konsulta Popular, tanba festa ne’e povu nian.
"Ita selebra loron ne’e tinan-tinan, maibé iha tinan ne’e aproveita ho loron reflesaun ida ne'e, marka prezensa mos husi Sekretariu Jeral ONU nomos Ian Martin, no entidade seluk ne'ebé Komisaun Organizadora hamutuk ho Governu organiza hela atu partisipa selebarasaun ida ne'e", nia hateten.
Nia hateten, serimonia ida ofisial los bá selebarasaun loron nasional konsulta popular ne’e sei iha enkontru bilateral ho Prezidente Republika, no Primeiru Ministru sei iha akordu ruma.
"Maibé selebarasaun ninia ajenda estadu prinsipal mak sesaun solene iha Parlamentu Nasional ne’e. Serimonia sira bá exposizasaun no diskursu sira sei halo iha Estadiu Munisipiu Dili Komisaun Organizadora agora organiza hela. Maibé eventu ida estadu ninia bá selebarasaun ne’e mak ida sesaun plenaria solene ne’e. Iha sesaun plenaria solene sei iha intervensaun bankada sira nian nomos diskursu husi Sekretariu Jeral ONU nian", nia hakotu.
