Tuir dadus provizoriu, sarani Katolika husi Nusa Tenggara Timur, Indonezia, na’in rihun tolu mak sei hola parte iha misa ne’ebé prezide direita husi Amu Papa durante ninia vizita iha Timor-Leste.

Hanesan públiku hatene, Amu Papa sei hala’o vizita mai Timor-Leste, iha 9 to’o 11 Setembru ne’e. Molok hala’o vizita mai Timor-Leste, Amu Papa mós sei hala’o vizita ba nasaun sira seluk, inklui Indonezia. Vizita ba nasaun viziñu ne’e sei hala’o durante loron tolu, husi 3 to’o 6 Setembru.

Embaxador Repúblika Indonézia iha Timor-Leste, Okto Donariu informa, nia parte koordena ho parte Igreja Katolika iha Nusa Tenggara Timur (NTT) hodi rejista sarani ne’ebé sei mai partisipa misa iha Tasi Tolu, Dili.

"Nusa Tenggara Timur sempre rejista sidadaun Indonézia sira ne'ebé sei halo viajen durante vizita misa Papa nian iha Dili,” Okto hafoin selebra loron independensia Repúblika Indonézia, iha Embaixada Indonezia, Farol, Dili, Sabadu (17/08).

Embaxadór ne’e hatete, nia parte simu ona informasaun husi parte Igreja Katólika NTT nian katak rejista peregrinus husi Indonézia hamutuk rihun tolu atu mai partisipa misa.

"Sira hatete mai ha'u katak iha rihun tolu ne'ebé rejista liu husi igreja sira iha Nusa Tenggara Timur," dehan Okto.

Ho sarani husi NTT nia viajen mai Timor-Leste, nia dehan, parte Indonezia mós sei tau atensaun ba kestaun seguransa.

“Ida ne’e signifika katak ita tau atensaun ba seguransa no seguransa ba abitante sira ne’ebé mai iha ne’e," dehan Embaixadór ne’e.

Molok ne’e, Prezidente Autoridade Munisipiu Lautem, Melio de Jesus informa, daudauk ne’e sarani liu ona na’in rihun tolu mak rejistu hodi bele partisipa iha misa ne’ebé prezide husi Amu Papa Francisco.

"Sarani sira rejista ona pur volta 3.000 itál. Ami la tau totál ema hira mak atu ba (Dili) maibé depende ba rejistu ne'ebé mak iha,” informa Melio via telefone, Tersa (06/08).

Nia afirma, husi PAM la determina númeru sarani ne’ebé atu ba partisipa misa. Ida ne’e depende ba sarani sira ne’ebé hakarak atu hola parte iha momentu istoriku ne’e.

“Sarani Lautém oan atu rejista karik rihun tolu ka liu husi númeru ne'e mós depende ba sarani ne'ebé mak hakarak partisipa misa iha Tasi Tolu,” dehan nia.

PAM, Melio hatutan, sei prepara kondisaun no transporte hodi tula sarani sira atu bele partisipa iha misa iha Tasi Tolu.

“Ita sei organiza ho kondisaun prepara transporte ho akomodasaun," dehan nia.

Enkuantu, tuir informasaun, Parokia Nossa Senhora Imaculada da Conceição, Katedral Dili, provizoriamente rejista ona sarani besik rihun rua ne’ebé sei ba partisipa iha misa iha Tasi Tolu.

Tuir informasaun ne’ebé Jornal INDEPENDENTE sita husi Tatoli, to’o iha 2 Agostu, sarani ne’ebé rejista ona iha Parokia ne’e hamutuk na’in 1.952.