Husi negosiante 71 ne’e, na’in-35 deside muda ba fatin ne’ebé governu, no na’in-36 deside fila ba sira-nia munisípiu.
Sekretáriu Estadu, Germano Santa Brites hatete, deside muda sai sira tanba governu hakarak hado’a Largo Lecidere ne’e sai di’ak no organizadu.
"Atividade muda negosiante sira ne'e normál, atividade ne'ebé la'o tinan ida nia laran ona, ekipa konjunta ne'e lidera husi SEATOU, la'o hamutuk hela dadaun halo hela servisu ba sidade Dili, tanba ne'e iha semana kotuk ita mai fó ona avizu, atu fó hanoin ba ita-nia maluk vendedór sira nomós maluk peskadór sira ne'e atu prepara-aan loron ida ohin ne'e ita muda sira," dehan SEATOU Germano ba Jornalista sira iha Largo de Lecidere, Sesta Feira ne'e.
Kona-ba prepara fatin ba negosiante sira, nia dehan, dadaun ne’e governu prepara ona Merkadu Maneluana II hodi husik Jardin Largo Lecidere ne’e bele livre.
Maibé nia dehan, muda vendedór provizóriu ba iha Merkadu Manleu ho sira nia kondisaun rasik hodi hein prosesu konstrusaun husi governu.
“governu prepara de'it rai iha ne'ebá rai estadu nian sira mak prepara sira lori rasik barak ka tenda oan sira ne'e sira harii rasik iha ne'ebá atu nune'e hodi hein governu prepara konstrusaun ba merkadu ne'e rasik iha ne'ebá para ba futuru sira bele halo negósiu di'ak liu iha laran, agora dadauk sira tahan lai iha ne'ebá governu sei la book sira iha ne'ebá, hakmatek iha ne'ebá para nune'e ita fasil atu kontrola vendedór sira iha ne'e."
Dadaun ne’e Merkadu Manleuana I ne’ebé vendedór nakonu ona, nune’e governu kria hikas merkadu II iha área Manleuana hodi akumula vendedór sira tau iha fatin ida, tanba negosiante sira iha fatin ida atu Jestaun Merkadu fásil kontrola sira.
"Merkadu Manleuana I ne'e fatin nakonu ona maibé maibé governu prepara fatin iha kotuk no agora vendedores barak mak tama ona iha ne'ebá, ohin ne'e husi fatin ida ne'e tenki ba tan iha ne'ebá nune'e depois sira seluk iha Elemloi, Kampung Baru, Komoro, Fatuhada sira mós ita sei muda ba hotu iha ne'ebá para nune'e vendedores ne'e hamutuk iha fatin ida para fasil jestaun merkadu hodi kontrola,” nia hatutan.
Kona-ba kompensasaun, vendedór sira iha Largo la hetan, tanba durante ne’e sira fa’an provizóriu de’it.
Vendedora Martinha Alves hatete nia parte la satisfaz ho governu nia desizaun ne'ebé muda sira husi Largo Lecidere, tanba sira fa’an sasán iha ne'ebá hodi sustenta sira-nia família no haruka oan ba eskola.
Nia mós lakohi muda ba iha Merkadu Manleuana ho razaun faan iha ne'ebá ema laiha atu hola, nia dehan depois de vizita Santu Padre hotu nia sei fila-fali ba faan iha Largo de Lecidere.