Reitór UNPAZ Adolmando Amaral hatete, estudante ne'ebé dadaun ne'e rejistu atu eskola iha eskola internasionál ne'e husi Índia, Filipina nomós Timór.

"Tinan ne'e ami estabelese klase internasionál ba Departamentu Medisina Jerál, estudante sira ne'e, mai husi Índia Filipina no mós Timoroan. Klase ne'e sei hahú iha fulan-Setembru iha UNPAZ", dehan reitór iha knaar fatin, sesta (9/08).

Nia dehan, estudante husi Índia no Filipina ne'ebé dadaun rejistradu atu mai tuir eskola internasionál iha fulan setembru ne'e, hamutuk 300 no Timoroan iha na'in 10.

"Iha Timor mós ema barak mak tuir teste maibé na’in 10 mak liu, nune'e mós iha Índia no Filipina entaun husi Índia no Filipina ne'e estudante ne'ebé fixu atu mai eskola iha fulan Setembru mak 300," nia informa.

Dosente sira ne'ebé sei hanorin iha eskola internasionál ne'e hamutuk 50 no husi Índia no balun husi UNPAZ.

"Sira sei mai hela iha otél ne'ebé iha. No dadaun ne'e ami prepara hela sala aprendizajen ho standart internasionál, ho kondisaun sira ne'e ami la iha problema, estudante sira sei selu tuir tarefa ne'ebé mak ita aplika ne'e, tanba klase ne'e internasionál entaun presu mós internasionál, tanba ema husi nasaun seluk mak mai eskola iha ne'e entaun propinas mós internasionál inklui fasilidade," nia tenik.