Selebrasaun loron Konsulta Popular ba dala 25 sei partisipa husi Sekretáriu-Jerál Nasoins Unidas António Guterres.

Tuir Komunikandu ne’ebé Online INDEPEDENTE asesu iha pájina portál governu katak, Programa ba selebrasaun Aniversariu Konsulta Popular ba da-25, ne’ebé hala’o iha Dili ba dahuluk sei hahú iha loron 28 fulan-agostu, iha Estádiu Munisipál Dili, ho abertura ofisiál ne’ebé sei marka prezensa husi Primeiru-Ministru no membrus Goveru sira seluk. No iha loron ne’e sei inaugura mos espozisaun ida kona-ba UNAMET no feira livru.

“Iha loron 29 fulan-agostu sei realiza han-kalan ofisiál iha Palásiu Lahane no espozisaun ida iha Arkivu no Muzeu Rezisténsia Timorense (AMRT) ne’ebé  dedika ba feto sira rezisténsia nian. Iha loron ne'e mós, sei hala'o "Horta Show", talk show espesiál ida ne'ebé sei marka prezensa husi Prezidente Repúblika, Primeiru-Ministru no Sekretáriu-Jerál Nasoins Unidas,” dehan Komunikando ne’ebé Online INDEPEDENTE sita, Kuarta (14/08).

Enkuantu, Pontu aas husi komemorasaun sira sei hala’o iha loron 30 fulan-agostu, loron ne’ebé selebra Aniversáriu Konsulta Populár tinan 1999 nian ba da-25.

No Loron ida ne’e, sei hala’o sesaun solene ida iha Parlamentu Nasionál, ho prezensa Sekretáriu-Jerál Nasoins Unidas, Prezidente Repúblika, Primeiru-Ministru no dignitáriu sira seluk.

Iha lorokraik, iha Estádiu Munisipál Dili sei hala’o serimÓnia públika, iha ne’ebé sei inklui diskursu, dansa tradisionál, minutu-hakmatek hodi fó omenajen ba vítima sira, no iha fogu artifísiu espetákulu ida. Hafoin serimónia ofisiál remata, sei konvida públiku hodi partisipa iha konsertu muzikál iha Sentru Konvensaun Dili (CCD).

Nune’e, Reuniaun Konsellu Minsitru mós deside fó toleránsia pontu durante loron lima ba selebrasaun aniversariu Konsulta Popular ba dala 25 no vizitasaun Sua Santidade Papa Francisco nian iha Timor-Leste.

Liu-husi despaixu Primeiru-Minístru, nomeia membrus Governu no lider administrasaun públika sira hodi prezide serimónia sira ne’ebé selebra aniversáriu ba dala-25 hosi data istórika ne’e.

No seremónia ne’e, sei hala’o iha munisípiu no postu administrativu sira iha Timor-Leste laran tomak, hodi garante reprezentasaun institusionál ne’ebé loloos no partisipasaun maka’as hosi populasaun.

Tanba ne’e, Konsellu Ministrus deside hodi fó toleránsia pontu iha loron 28 no 29 fulan-agostu, iha ámbitu selebrasaun Aniversáriu Konsulta Populár ba da-25 no iha loron 9 to’o 11 fulan-setembru, iha okaziaun vizita Sua Santidade Amu-Papa Francisco nian mai Timor - Leste.