Ministru Administrasaun Estatál, Tomas Cabral informa, Governu Australia apoiu aviaun espesial ida bazeia ba pedidu husi Vatikanu, ho seguransa inklui ambulansia no kompletu ho doutor espesialista sira.

"Aviaun ne'e Vatinakanu mak husu, Austrália mak sei entrega direita ba iha Vatikanu hodi semo mai Timor-Leste, aviaun seguransa militár espesial, inklui ambulansia no ospitál kompletu iha Austrália, apoiu ba Vatinkanu durante vizita Amu Papa iha Timor-Leste," dehan Ministru Tomas ba jornalista sira hafoin enkontru altu nivel iha eskritoriu Sekretáriadu Nasional Motaél, Kinta (27/06).

Tanba ne’e aviaun espesial ne’ebé Australia apoiu ba vatikanu ho forsa militar daudauk ne’e konfirma hela fatin ba aviaun nia para fatin.

"Austrália husu ona ita, agora ita sei deside fatin aviaun militár ne'e para iha Austrália ka para iha Díli, sé para iha Dili ita konkorda, para iha Austrália mós ita konkorda," dehan nia.

Ba kondisaun ikus liu, nia dehan, governu Timor-Leste sei diskute ho Embaixada Austrália, maibé Austrália dehan katak sira disponivel, tanba sira mak oferese aviasaun espesial ne’e ba Vatinakanu.

“Ita mós sei entrega karreta 9, motorizada rua ba nunsiatura iha loron loron 09 fulan Setembru no  karreta hirak ne‘e sei funsiona permanente iha Nunsiatura nia fatin iha Motael," katak nia.

Aleinde ne’e Governu Indonezia mos sei ajuda doutor balun mai iha Hospitál Nasionál Guido Valadares (HNGV).

Tan ne’e, Governu daudauk ne’e halo hela manutensaun ba klinika iha HNGV hodi fó tramentu saude ba bainaka sira ho sarani iha Timor-Leste.

"Ita hanesan uma-nain, iha obrigasaun prepara karreta, Amu Papa lakohi sae karreta sira luxu. Ami ba ona iha patrimoniu Estadu iha ne'ebá karreta Governu nian, ami foti mini bus haat, auto movel rua, mini bus ki'ik ida, no karreta movel ida sosa ona  Amu Papa atu uza."

Kona-ba karreta ba Amu Papa, nia dehan, dezeñu Vatinakanu mak haruka mai, no karreta ne’e sei entrega oras balun molok Amu Papa to’o iha Aeroportu Timor-Leste.

Aprezenta kestaun seguransa ba Nunsiatura

Ministru Interior ho Ministru Defeza, iha 8 Jullu, sei aprezenta kestaun seguransa ba Sekretariuadu Nunsiatura.

Ministru Interior, Francisco Guterres informa, ekipa konjuntu hasoru malu hodi ko'alia ona kona-ba preparasaun seguransa kona-ba simu vizita Amu Papa mai Timor-Leste iha fulan Setembru, tanba ne’e iha loron 08 fulan jullu semana oin sei aprezenta hikas konaba preparasaun seguransa ba sekretariudu nunsiatura iha Motael.

"Maibé preparasaun detailu ami sei aprezenta iha tempu besik, ba seguransa ami preparadu, importante sarani sira ba misa tenke ho kalma no kontente," dehan Francisco, hafoin partisipa iha serimónia aniversáriu APC ba dala II, iha Kaikoli, (29/06).

Kria Ekipa Taskforce ba limpeza

Igreja Katólik no Governu Timor-Leste hahú prepara no sei kria ekipa taskforce ida atu halo limpeza jerál no prepara fatin ba sarani iha semana ikus antes vizita Amu Papa Francisco.

Dom Virgilio Kardeal do Carmo da Silva hatete, enkontu entre Igreja no Governu nian ne'ebé partisipa husi Ministru Administraun Estatal, Ministru Defeza no Ministru interior ne'e la'os bu'at foun ida ne'ebé atu haree fila-fali preparativu sira.

"Enkontru ohin la'os bu'at foun ida ne'ebé atu ami haree fila-fali ami nia preparativu sira ne'e to'o iha ne'ebé ona, saida mak atu hadia, entaun ami enkontru ne'e haree liu kona-ba serbisu sira ne'ebé ami presiza iha kordena di'ak liu tan," dehan nia hafoin enkontru kordenasaun iha Sekretáriadu Igreja Lokál Vizita Papa Francisco Motael, Kinta (27/06).

Nia afirma, ne'e duni mak folow up bá iha bu'at ne'ebé halo ona enkontru anterior ne'ebé la deskute bu'at foun maibé atu hadia di'ak liu tan koordenasaun entre ekipa sira.

"Ohin prátikamente la iha rekomendasaun barak, maibé bu'at ida ne'ebé ami rejista fila-fali, purezemplu oinsá mak bele kria taksforce, purezemplu atu monta limpeza iha Tasi Tolu no atu monta Barikada sira ne'e iha tasi tolu, sé mak atu halo," nia salienta.

Dom Virgilio dehan, entaun atu dehan katak agora presiza iha Lojistiku, entaun Igreja iha ninia ekipa Lojistika, Governante mós hanesan, oinsá mak tau hamutuk forsa sira ne'e hotu atu la'o hamutuk, entaun enkontru ida ne'e haree oinsá mak kria kordenasaun.

Durante ne'e la'o bu'at ne'ebé mak aas nian de'it agora tun ona mai ida ki'ik oinsá halo limpeza, oinsá monta ida ne'e monta ida neeba, sé mak atu halo sé mak atu halo entaun ne'e ko'alia kona-ba serbisu.

"Entaun serbisu ne'e mak tun ona mai parte serbisu ho nune'e enkontru ne'e ami haree kordenasaun, tanba ne'e mak liga ho ita boot ninian, ami haree parte ida la'os Igreja de'it la'os estadu de'it, maibé rua haree oinsá mak oinsá mak tau hamutuk forsa ida ne'e atu kria boot," nia dehan.

Parte Igreja nian hanesan publiku hatene katak ekipa Voluntariu nian halo hela mós rekrutamentu bá voluntariu sira ne'ebé mai serbisu vizita Amu papa nian ne'e la'o de'it iha loron ne'ebé Amu Papa mai ajuda de'it iha tempu neeba, maibé molok ida ne'e saida mak tau forsa hamutuk hodi limpeza, tanba tasi tolu la'os fatin ki'ikoan no mós ho preparasaun sira ne'e hotu.

"Ha'u kuaze fulan ida ha'u la bá Tasi Tolu tanba ne'e mak ha'u seidauk bele hatene ninia progresu konstrusaun neeba to'o ona pursentu hira maibé ha'u hatene katak la'o kapás ne'ebé ita hein," nia dehan.

Bainhira mak halo limpeza agora ida ne'e seidauk determina depende bá Ekipa konjunta, sein duvidas limpeza sira kala sei tama ba Semana ikus molok Amu Papa nia vizita, haree limpeza, haree mós kona-ba oinsá monta fatin sira ne'ebé sarani sira mai husi Munisipíu hodi hela bu'at sira ne'e hotu sei tama ba loron ne'ebé antes amu Papa vizita.