Tuir informasaun ne'ebé INDEPENDENTE asesu husi fonte importante ne'ebé lakohi públika nia identidade, Tribunál Supremu Justisa (TSJ) hatun akondaun final hodi estradita fujitivu Teves ba Filipina.

Tanba, fonte ne’e dehan, TSJ konsidera krime ne'ebé Ministeriu Públiku imputa ba fujitivu Teves provadu hotu.

"Akordaun final husi Tribunál Supremu Justisa hasai ona, posibilidade 75 pursentu ne'e tenke estradita Arnolfo Teves Jr. ba nasaun orijen, Filipina, tanba Tribunál fó tempu loron 30 ba Defeza atu halo rekursu kontra desizaun Tribunál Supremu Justisa nian," informa fonte ne'e.

Ba kestaun ne’e, Arnolfo nia defeza, José Ximenes hatete, nia simu ona karta notifikasaun husi TSJ kona-ba akordaun hodi estradita nia kliente.

"Loos desizaun Tribunál Supremu Justisa nian fó sai ona hakarak estradita Arnolfo Teves Jr. ba nasaun orijen Filipina, maibé Tribunál fó tempu loron 30 nia laran ami sei hato'o rekursu kontra desizaun tribunál," dehan José, ba Jornalista INDEPENDENTE, via WhatsAap, Sesta (28/06).

Daudauk ne’e, nia dehan, defeza ho família prepara hela rekursu atu kontra desizaun tribunal.

"Agora ami ho família koordena malu prepara rekursu atu kontra desizaun Tribunál Supremu Justisa nian.”

“Familia seidauk autoriza ha'u atu ko'alia buat ruma ba ita-boot jornalista sira," katak nia.