Eskola Bázika Fillial (EBF) Daga-Mesa ne’ebé harii iha tinan 2006 to’o ohin loron sei hasoru problema ho sala aprendizajen no fasilidade aprendizajen nian.
Prezidente Repúblika, José Ramos Horta deklara prontu atu fó apoiu ba EBF Daga-Mesa.
Horta dehan, se professor sira ne’ebé hanorin iha ne’ebá voluntáriu karik, nia prontu atu selu sira temporáriu to’o governu hetan solusaun definitivu.
"Ha'u la hein tan governu atu halo ka la halo. Primeiravez ha'u rona ida ne'e, fó informasaun mai konkretu ha'u haruka kedas ekipa ba halo eskola foun, ekipamentu ba sira," dehan PR Horta ba jornalista sira hafoin partisipa iha serimónia selebrasaun loron internasionál kona-ba Mariñeiru, iha edifísiu Federasaun Hanai Malu, area Palásiu Prezidensiál nia kotuk, Sesta (28/06).
Tuir Xefe Estadu ne’e, iha eskola sira fasilidade barak loos ne'ebé laiha. Ida ne’e laos kulpa Governu atual, maibé tanba balansu jerál setór edukasaun nian ne’ebé negativu loos.
Nia esplika, eskola lubuk ida halo desde indepedénsia maibé laiha manutensaun nune’e eskola sira sai aat.
“Tnan-tinan tenke haree kalen, janela, tenke haree hariis-fatin, ne'e tenke orsamentu espesiál ba manutensaun infra-estrutura nian, governu sira la haree ida ne'e.”
“Depois populasaun aumenta tenke haree aumenta mós eskola, tenke aselera formasaun professor. Ministra Edukasaun atual nia kompetente, badinas, ema barak kritika maibé tanba nia buka hamate tiha ida partidarizasaun iha setór edukasaun.”
Tan ne’e, Xefe Estadu ne’e dehan, ida ne’e sei lori tempu maibé fiar ho nia lideransa PM Xanana nian, sei iha hetan rezultadu ne’ebé di’ak.
“See-see mak professor, la interese nia partidu mais tenke iha formasaun no tenke iha kompeténsia, tenke kontratu ne'e legal, labele tama tanba partidu, maibé labele duni sai ema tanba partidu seluk.”
"Ha'u fiar Ministra Edukasaun la halo ida ne'e tanba ne'e sira loke konkursu foun, uitoan de'it mak passa konkursu ne'e tanba signifika laiha formasaun," katak nia.
Molok ne’e, Professor EBF Daga-Mesa, Damião de Jesus Araújo informa, eskola EBF Daga-Mesa ne’ebé hari'i iha tinan 2006 ho orsamentu pakote referendu daudauk ne’e hasoru problema sala ne’ebé la sufisiente no fasilidade eskola hanesan kuadru, meza, kadeira, bibluateka no seluk tan.
Ba problema sala ne’ebé la to’o, nia dehan, molok ne’e klase rua tenke tama iha sala ida no fahe kuadru iha klaran hodi hakerek material.
Maibé, daudauk ne’e, parte eskola fahe ona estudante sira ba tornu rua. Estudante tinan dahuluk to’o datoluk tama dader, no klase dahaat to’o daneen tama lokraik.
“Eskola ne'e rasik kondisaun la di'ak tanba falta buat barak, eskola mós ita taka provizóriu, sasán iha eskola laran ne'e hanesan kuadru, meza, kadeira buat sira ne'e falta hotu no mós bibluateka laiha," dehan Damião ba jornalista INDEPEDENTE, Kinta (27/06).
Xefe Suku Mau-Ulu, Luís Valadares Colasu informa, EBF Daga-Mesa nafatin hasoru problema.
"Ita hatene katak eskola ne'e hari'i iha tinan 2006 maibé to'o agora nia kondisaun sei nafatin hela, seidauk iha mudansa, foin daudauk anin mai ne'e sobu fila fali," dehan nia.
