Vizita Amu Papa iha TL, Autoridade bandu Timor-oan fó solidariedade ba rai seluk Featured

By Domingos Gomes Jullu 09, 2024 839
Sua Santidade Papa Francisco. Foto:Google. Sua Santidade Papa Francisco. Foto:Google.

DILI: Ho razaun atu kria pas no hakmatek durante Amu Papa Francisco nia vizita mai Timor-Leste iha fulan Setembru nia laran, autoridade defeza no seguransa Timor-Leste bandu atu sidadaun sira lori nasaun ka rai seluk nia bandeira hodi halo asaun solidariedade.

Desizaun ba proibisaun ida ne’e mosu liu husi enkontru entre Komando Falintil Forsa Defeza Timor-Leste (F-FDTL) ho Komando Polisia Nasionál Timor-Leste (PNTL) hodi diskuti kona-ba asuntu seguransa relasiona ho vizita Amu Papa Francisco.

Xefe Estadu Maiór Jenerál F-FDTL, Tenente Jeneral Domingos Raul ‘Falur Rate Laek’ hatete, durante vizita Amu Papa iha Timor-Leste, bandu sarani no grupu seluk atu dada bandeira nasaun seluk hodi fó solidaridade.

“Durante vizita Amu Papa iha Timor-Leste, sarani sira bele dada bandeira Timor-Leste, maibé bandeira nasaun seluk ne’e ita bandu atu dada hodi fó solidariedade ba rai seluk. Tanba ita rai ida kiik, halo atu implika fali relasaun ho país sira viziñu hanesan Indonezia ho Australia. Agora ita servisu hamutuk ho Indonezia, ita respeita sira-nia hanoin no hakarak, maibé idaidak hakmatek iha nia fatin," dehan Falur ba jornalista sira hafoin enkontru, iha Kuartel Jeral PNTL, Kaikoli Sabadu (06/07).

Aleinde kestaun ne’e, nia hatutan, iha enkontru entre Komando F-FDTL ho PNTL ne’e Komanadu Forsa Tarefa halo aprezentasaun kona-ba sira-nia planu.

“Ohin (horibainrua) ami rua (Komisariu PNTL) nia avaliasaun no apresiasaun saida mak tenke hadia, tuir duni diretiva politika no tuir lei sira ne’ebé mak iha ka lae, nune’e iha loron 8 Jullu sei aprezenta ba Komisaun Altu Nivel iha Motael,” dehan nia.

Iha fatin hanesan, Komandante Polisia Nasional Timor-Leste, Komisariu Jeral Polísia Henrique da Costa hatete, enkontru ne’e hodi rona Forsa Tarefa husi PNTL no F-FDTL. Sira nu’udar ekipa ne’ebé instala ona iha Kuartel Jeral PNTL hodi halo servisu ba prepara simu vizita Amu Papa.

"Ohin sira aprezenta mai ita planu preparativu sira, ohin hetan ona aprezentasaun, ita fó ona apresiasaun ba iha planu ne’ebé mak iha, ida ne’e mak sei implementa iha terenu, sai hanesan orientasaun ida ba iha forsa rua, tantu PNTL ho F-FDTL," dehan Komisariu Henrique.

Rate this item
(0 votes)

Independente Digital TV