Membru Senior Officials Meeting ASEAN, Sidharto Reza Suryodipuro hatete, nia parte ho delegasaun sira hasoru Primeiru-Ministru Kay-Rala Xanana Gusmão, atu hare prosesu no progresu preparasaun Timor-Leste nian ba ASEAN liliu iha pillár ekonomia.
“Ha’u hamutuk ho delegasaun mai hasoru-malu ho Primeiru-Ministru atu haree prosesu no progresu preparasaun Timor-Leste nian bá ASEAN liu-liu iha pilár ekonomia. Hato’o ami-nia vizaun no rona mós vizaun Timor-Leste nian kona-bá kooperasaun ASEAN nian iha área ekonomia,” dehan Sidharto Suryodipuro iha Palásiu Governu, Tersa (09/07).
Membru Senior Officials Meeting (SOM) ASEAN haree katak, Timor-Leste sai ona membru ASEAN bazeia bá desizaun ne’ebé foti iha tinan 2022 no daudaun iha roteiru ne’ebé guia TL atu sai membru plenu ho pilár tolu mak hanesan, pilár polítika no seguransa, ekonomia, sosiál no kultura.
Hosi roteiru ne’ebé iha, pillár ekonomia ninia indikadór barak mak tenke kumpri, tanba ne’e tenke servisu makás no lalais atu realiza duni iha tempu tuir-mai.
Vise-Ministra Asuntu ASEAN, Milena Maria da Costa Rangel ne’ebé akompaña delegasaun, agradese bá Governu Indonézia tanba ho vizita ida-ne’e ekipa hakarak duni atu hatudu boa vontade iha apoiu Timor-Leste nia adezaun bá ASEAN.
“Agradese ba governu Indonézia ho vizita ida atu mai apoiu ita hanesan mos som lider Indonézia nian mai atu hare ita nia prosesu adezaun ba ASEAN au mesmu tempu pronunsia apoiu kontinuasaun iha Timor-Leste iha prosesu adezaun,” dehan Vise-Ministra
Nune’e, Delegasaun ne’e mós sei hasoru-malu ho membru IX Governu ne’ebé lidera asuntu ekonomia nian.