“Hotu-hotu sei hetan, la iha ema ida ke la hetan indiminizasaun. Simu ona sira nia konta bankaria ba ajuda, la’os ba duni arbiru deit lae,” dehan PM Xanana, hafoin hala’o enkontru ho Prezidente Repúblika José Ramos Horta, iha Palásiu Prezidénsial Aitarak-laran, Dili, Kinta ne’e (09/01/25).
Nune'e, Primeiru-Ministru mós husu ba komunidade sira ne'ebé seidauk hetan indiminizasaun atu halo karta ba Primeiru-Ministru, atu nune'e bele husu ba Sekretáriu Estadu Asunto Toponimia Organizasaun Urbana hodi hatene nia kauza lolos.
“Ne'e mak sira ne'ebé seidauk simu ne'e, hakerek surat mai ha'u para ha'u bele haruka SEATOU haree, tanba sá mak imi seidauk selu," katak PM Xanana.
Iha biban ne’e, Xefe Governu mós husu ba Autoridade Lokal sira atu rekolla dadus konaba estudante universitariu sira ne'ebé afeita ba eviksaun iha aldeia Fomentu II, hodi aprezenta ba Primeiru Ministru atu haree.
Entretantu, tuir dadus total vitima eviksaun iha Aldeia Fomentu II, Suku Komoro, Postu Administrativu Dom Aleixu, Munisipiu Dili hamutuk uma-kain 288.
Enkuantu, vitima uma-kain 288 ne’e seidauk hetan indiminizasaun husi Governu.
