"Husi Governu Indonézia fó hatene ona atu halo negósiasaun fronteira marítima," dehan Primeiru-Ministru Kay Rala Xanana Gusmão ba Jornalista sira hafoin remata enkontru ho Prezidente Repúblika José Ramos-Horta iha Palasiu Prezidensial Ai-tarak Laran, Kinta (09/01/25).

Xefe Governu dehan, Governu Indonézia uluk lakohi, maibé maske ho Naktuka ne'ebé seidauk los, tanba fronteira Naktuka Oekusse nia mai baliza to'o de'it iha mota-ain no ba fali Salele.

Tanba ne'e, Governu Indonézia senti katak tinan ida ne'e, hahú halo Negósiasaun ho Governu Timor-Leste, tanba Timor-Leste presiza atu bele kontrola Peska ilegál ne'ebé la'o hela iha área tasi mane.

Enkuantu, molok ne'e, Primeiru-Ministru Kay Rala Xanana Gusmão hatete, Governu sei esforsu an maka’as atu estabelese fronteiras terestre no marítimas ho indonezia, tanba ida ne’e hanesan prioridade nasional ida.

“Ida ne’e Prioridade Nasional ida, la’ós de’it atu kompleta funu naruk kona-bá soberania, maibé mós atu hetan seguransa jurídika no téknika kona-bá rekursu iha espasu marítimu iha ita ninia jurisdisaun, no ne’e hotu sei permite mai ita atu implementa polítika ekonomia azul ne’ebé sustentavél,”dehan PM liu husi aprezentasaun Proposta OJE 2025, iha Parlamentu Nasional, Kuarta (06/11/24).

Xefe Governu hatutan, iha inisiu tinan 2025, governu formaliza ona adezaun ba Organizasaun Mundial no Komersiu (OMK), no tinan tuir mai Timor-Leste atu sai membru ASEAN.

Tan ne’e, PM Xanana akresenta, Iha organizasaun rua ne’e nia laran, merkadu foun no oportunidade foun sei nakloke ba Timor-Leste hodi ezije ba Timoroan sira uza ho intelijensia no responsabilidade.

 Tanba iha tinan 2025 sei sai tinan ba implementasaun no sei la lakon tempu atu potensializa rekursu alternativus ba dezenvolvimentu Timor-Leste nian.