Sekretáriu Estadu Protesaun Sivil, Domingos Mariano Reis, hatete, tuir Dekretu Lei Nu.7/2021 katak vítima dezastre naturais iha direitu atu hetan materia rekoperasaun, orsamentu transporte no mão de obra.

“Material ne'ebé Protesaun Sivil apoiu ba vítima sira ne'ebé tama iha kategori aat total simu material hanesan kalen, prafuju, martelu, metru, besik kotak, besi beton, arame, balde kiik, kanuru kiik ho boot no semente, pregu no osan ba transporte ho montante dolar amerikanu $150 no mãe de obra $850,”dehan nia iha Salaun Ginasio Maliana-Vila, kinta (14/09/23).

Governante ne’e dehan, ba kategori aat natoon sei simu kalen, prafuju, martelu, metro, besik kotak ho osan transporte $150 no maõ de obra $600 no ba kategori aat kamaan simu kalen, prafuju, martelu, metru ho osan transporte $150 no mãe de obra$450.

Tan ne’e, SEPS husu ba ba vítima sira atu labele halo tan uma iha fatin risku hanesan, tasi ibun, mota ninin no foho lolon, no tenki muda ba fatin ne'ebé seguru.

“Ha'u husu ba komandante operasional, Xefi Suku no Xefi aldeia sira atu kontrola didiak vítima sira ne'ebé simu ona sasan tenki halo no hadi'a filafali sira nia uma," tenik nia.

Iha fatin hanesan, Sekretáriu Autoriedade Bobonaro João do Carmo da Silva, husu ba komunidade sira ne'ebé sai ona vítima ba dezastre naturais ne'ebé hetan ona material rekoperasaun atu labele fahe, no fa'an filafali sasan hirak ne'e.

Iha biban ne’e, Sekretáriu Autoriedade Bobonaro hato'o agradese ba Governu tanba bele apoia ona material rekuperasaun no finanseiru ba vitima dezastre naturais sira.