“Objetivu husi enkontru ne’e mak, atu halo diskusaun no aprezenta relatoriu implementasaun Planu Asaun Nasional ba Ema ho Defisiénsia ba durante fulan neen nia laran, hodi hare nia progresu sira no mós identifika nia dezafiu sira, no saida mak seidauk halo ita bele halo kompleta,”dehan Ministra Solidariedade Sosial no Inkluzaun, Verónica das Dores, iha Salaun Suai Room Timor-Plaza, Sesta (15/09).
Ministra dehan, objetivu seluk mak atu koalia kona ba Planu Asaun Anual 2024 nian.
Governante ne’e haktuir, sei hari mós sekretáriadu permanente ida no konsellu nasional ba ema ho defisiénsia sira.
Iha fatin hanesan, Diretór Raes Hadomi Timor Oan Joanzito do Santos hatete, RHTO nia observasaun durante IIIV no IX Governu iha komitmentu hotu, politika diferente maibé objetivu ne’ebé ida deit, katak ba dezenvolvimentu ida ne’ebé atu asegura ema hotu nia partisipasaun no la husik ema ida iha kotuk.
Nia dehan, iha IX Gevernu mós iha ona komitmentu ida atu hari konsellu ida ba EhD, ne’ebe iha ona politika atu lori ba Konsellu Ministru hodi halo diskusaun.
Nia dehan, ba asuntu defisensia iha mós buat barak ne’ebé prezisa tau prioridade, ida mak implementasaun ba Planu Asaun Nasional ba EhD 2021-2030 ne’ebé tenki la’o nafatin.
Nune’e mós Konsellu Nasional ba EhD ne’ebé seidauk estabelese, maibé iha ona esbosu lei, ne’e komitmentu ne’ebé diak, tanba esforsu ne’ebé durante EhD sira halo mak atu lori defisiénsia sira nia preokupasaun.
“Ita mós labele haluha katak konvensaun direitu Ehd aprova no ratifika ona ne’ebé envigor entrada, hodi bele implementa, signifika katak governu no estadu ida ne’e iha komitmentu tomak, ita mai ho prinsipiu direitu demokratiku entaun ita mós iha komitmentu atu nunee komisaun sira nee labele sai dokumentus deit, maibe tenki iha komprimisiu ida hodi implementa,” dehan Diretor.
Iha fatin hanesan, Vise Embaixador Australia Suzy Wilson Uilelea hatete, Australia iha komitmentu boot tebes hodi halo advokasia ba entidade defisiensia no fó apoia ativa ba sosiedade sivil iha área refere.
