Enkuantu, traballadór hirak ne’e sei desloka ba Korea Súl iha loron 17 Fulan-Setembro 2023.

Tan ne’e, Sekretáriu Estadu Formasaun Profisional no Empregu Rogerio Aroújo Mendonça husu ba traballadór sira ne’ebé hetan ona oportunidade atu ba servisu iha Korea, tenki kumpri regra no prosedimentu ne’ebé estadu Korea ho Timor-Leste estabelese ona.

Nia dehan, traballadór sira ne’e maioria ba iha área peskas, tan ne’e tenki kumpri regras ne’ebé iha ona no labele halai sai husi Sistema.

“Se imi kontribui ho Estadu rua ne’e, estadu sei proteze imi , moras ruma akontese iha servisu fatin estadu buka dalan hodi lori mai Timor, sé hetan insidente ruma, governu rua tur hamutuk hodi husu ba empregadór hodi fó imi nia kompensasi, se ita boot sira sai husi sistema risku barak,” dehan Sekretariu iha Salaun Timor Lodge Komoro, Sesta (15/07).

Governante ne’e mós sujere ba traballadór sira atu kuidadu an, rai osan ajuda familia, labele hemu tua no joga.

Iha fatin hanesan, Reprezentante Embaixadór Korea iha TL, Yang hatete, estadu Korea loke ona fatin ba traballadór husi nasaun 16 inklui TL hamutuk rihun 120, ne’ebé hakarak ba servisu iha Korea.

Nia dehan, maibé Timor-Leste nia traballadór ne’ebé ba servisu iha Korea seidauk atinji 1%, signifika seidauk atinji to’o númeru 1.020 traballadór.