Deputadu Bankada FRETILIN, Antoninho Bianco hateten, VIII Governu Konstitusionál bele lori fali proposta Lei OJE tinan fiskal 2020 no 2021 ba PN hodi halo diskusaun.

Deputadu deklara ida ne’e fundamentu ba Konstituisaun artigu 97, alínea 3 katak “Projetu no Proposta lei ne’ebé sesaun lejizlativu ida la simu, sei bele sisi nafatin iha sesaun ne’e nia laran”. Ne’e duni, sei iha dalan atu bele aprezenta hikas.

“Ha'u uza artigu 97 alínea 3, tanba ne’e lei ne’ebé la pasa iha Parlamentu Nasionál ne’e labele hatama duni tinan ne’e, maibé bele hatama iha tinan lejizlativa foun,” dehan nia, iha Uma Fukun PN, horisehik.

Deputadu Antoninho dehan, tuir artigu 45 rejimentu Parlamentu Nasionál hateten, lejizlativa ida hahú 15 Setembru to’o 14 Setembru.

Nune’e, foin daudauk proposta Lei OJE la pasa ne’e iha segunda lejizlativa, iha 15 Setembru 2019 no tinan lejizlativa ne’e sei termina iha 14 Setembru 2020.

“Dia 15 Setembru 2020 ne’e terseira lejizlativa. Terseira lejizlativa ne’e bele ona hatama Orsamentu Jerál Estadu liga ho artigu 97 alínea 3 Konstituisaun,” tenik nia.

Nia dehan, iha ema balun entende katak VIII Governu labele haruka ona OJE mai Parlamentu Nasionál, maibé tenke Governu seluk. Maibé lae, tanba VIII Governu ne’ebé agora eziste ne’e Governu konstitusionál.

Governu ne’e povu no Estadu nian, entaun Parlamentu Nasionál viabiliza Governu hala’o servisu nafatin.

Nune’e, dekretu Governu ne’ebé iha ne’e VIII Governu nian, tan ne’e Governu iha kompeténsia plenu atu aprezenta fali nia OJE.