Pozisaun AJTL nian kontra ezbosu lei ne’e tanba sei hamosu sensura no jornalista sira sei halo auto sensura ba nia-aan raik. Tanba ne’e, sei hata'uk jornalista, ativista no akademista sira atu halo kritika no investigasaun ba kazu sira ne'ebé iha ligasaun ho korrupsaun.
“Polítiku no governante sira kuandu envolve iha kazu ruma ema la brani ona atu kritika, lei kriminalizasaun ne’e atu proteje de’it ema sira ne'ebé agora iha Governu,” dehan Sekretáriu Jerál AJTL, Alberico Junior, iha sede AJTL, Fatuhada, horisehik.
Nia hateten, Lei Difamasaun ne’e la’’o ona no halo kampaña iha inisiu 2003 to’o 2006, maibé Prezidente Repúblika iha tempu ne'ebá Xanana Gusmão no José Ramos Horta konsidera la di’ak ba prosesu atu harii demokrasia. Nune’e, muda artigu ne’e ba iha kódigu sivíl, maibé agora polítiku na’in sira atu foti fali.
Iha artigu balun ne'ebé dehan iha ezbosu lei ne’e, jornalista ka ema ruma atu halo publikasaun ruma tenke hatudu faktu loloos, bainhira ko’alia kona-ba faktu jornalizmu iha verasidade buat seluk, la’ós verasidade ne'ebé mosu iha tribunál.
Verasidade tuir jornalizmu ohin deskobre faktu ida, maibé aban bele mosu tan faktu seluk to’o ikus liu mak hetan ona rezultadu investigasaun.
“Labele dehan informasaun ne'ebé média fó sai ne’e loos ona, ida ne’e sai hanesan informasaun inisiu atu motiva Komisaun Anti Korrupsaun (KAK) no Ministériu Públiku no sira ne'ebé iha kompeténsia atu halo investigasaun ba kazu sira ne'ebé mosu”, tenik Alberico.
Durante ne’e, lao tuir kodigu etika entaun dala barak iha liafuan sira ne’e tau deskonfia, maibé sira husu atu hatudu faktu.
Iha fatin hanesan, Prezidente AJTL, Zevonia Vieira hateten, impaktu ne'ebé jornalista sira husi nasaun seluk hetan hanesan Indonézia, Laos, Vietname no Filipina sai vítima ba lei kriminalizasaun ba difamasaun.
Nia afirma, AJTL sei halo nafatin aprosimasaun ba Governu no mós sei halo mós karta ba PN atu sira bele tetu didi'ak impaktu negativu husi lei ne’e.
AJTL mós sei halo petisaun ba Ministériu Justisa no sei kontinua mos halo advokasia ba sosiedade sivíl no akadémiku sira katak públiku la satisfás ho desizaun Governu nian atu kriminaliza difamasaun.
