Antes ne’e, iha loron 2 Abríl 2020, Parlamentu Nasionál Nasionál aprova ona proposta artigu 2A alínea 2, ne’ebé atribui osan rihun US$500 husi tokon $150 ba Fundu Covid-19 hodi halo fiskalizasaun.

Vise-Prezidente Bankada FRETILIN, Deputadu Antoninho Bianco hateten, osan rihun US$ 500 di'ak haruka fila ba Governu hodi atende ba situasaun Covid-19.

“Ami halo proposta para osan ida rihun US$ 500 ba governu hodi bele servisu Covid-19 nian,” dehan nia, iha Parlamentu Nasionál, horisehik.

Deputadu Antoninho dehan, Parlamentu Nasionál nia osan duadesimu iha hela atu halo fiskalizasaun.

Nia hatutan, momentu iha diskusaun proposta lei ne’e, Bankada FRENTILIN husu lalika tau orsamentu ba PN, tanba orsamentu Covid nian Governu mak ezekuta. Maibé orsamentu ne’e kontinua pasa tanba maioria deputadu husi bankada sira seluk la apoia.

“Proposta ne’e la liu tanba momentu ne’e iha ambiente oin seluk. Ha'u hakarak osan tokon US$150 tomak iha governu,” dehan nia.

Nia informa, prosesu preparasaun ba proposta eliminasaun osan rihun US$ 500 hodi haruka fila kofre estadu iha hela faze diskusaun.

Iha fatin hanesan, Prezidente Bankada CNRT, Duarte Nunes hateten, Bankada CNRT mós deside ona prepara proposta hodi alterasaun osan rihun US$ 500 hodi haruka fila ba Fundu Covid.

Nia dehan, hanoin atu iha orsamentu ruma para deputadu sira bele uza hodi halo akompañamentu ba gastu sira ne’ebé sira halo durante Covid nian.

Maibé, nia hatutan, deputada Bankada CNRT mós konkorda ona atu halo proposta elimina husi orsamentu Parlamentu Nasionál hodi entrega fila-fali ba Governu.

“Ami halo ona desizaun iha nivel Bankada, ami konkorda atu halo proposta hodi haruka fila osan rihun $500 ba fundu Covid-19 nian,” tenik nia.

Kona-ba bainhira mak aprezenta ba proposta hodi alterasaun, nia dehan, agora depende ajenda iha plenária, bainhira Parlamentu Nasionál iha debate orsamentu dala ruma Bankada bele hato’o ona proposta.