Embaxada Japaun iha Timor-Leste apoia orsamentu ne’e ba Governu Timor-Leste liuhusi Ministru Negósiu Estranjeiru Kooperasaun (MNEK) Demisionáriu, Dionísio Babo Soares.

Ministru Negósiu Estranjeiru no koperasaun Demisionáriu, Dionísio Babo Soares hatete, durante ne’e Timor-Leste buka esforsu hetan apoia husi nasaun seluk hodi kombate coronavirus ne’e.

“Governu Japaun fó apoiu orsamentu ho valór tokon $4.6  nune’e bele apoiu ita hola aimoruk COVID-19 hanesan ekipamentu, sanitizer no roupa protesaun ba médiku sira nomoos ai-moruk seluk ne’ebé ita presiza liu ministériu saúde nune’e bele responde moras ne’ebé ita hasoru”, Ministru  Demisionáriu ne’e ko’alia iha edifísiu MNEK, Praia dos Coqueiros,  Dili, horisehik.

Ministru Dionísio Babo Soares apresia ho Embaixadór foun Japaun KINEFUCHI Masami ne’ebé foin entrega karta kresidensiál ba Prezidente-Republika, Francisco Guterres “Lú Olo” iha fulan rua liu ba maibé bele responde rapidamente iha ámbitu luta hasoru COVID-19 iha Timor-Leste.

Nia akresenta, Japaun  hanesan nasaun ne’ebé bele halo prevensaun di’ak ba kombate Covid-19 no daudaun ne’e nasaun barak mak louva sira.

“Espera katak ho apoiu sira-nee hotu, karik moras ne’e alastra iha ita-nia rain ita fasilmente bele halo tratamentu”, hateten Ministru Demisionáriu ne’e.