Molok ne’e, veteranu ida Tera Bulak hasoru-malu ho Primeiru Ministru Taur Matan Ruak hodi aprezenta ninia hakarak atu harii edifisiu KKLN iha eis edifisiu DPR tingkat 1, Kaikoli, ne’ebé mós tuir planu sei harii edifisiu Tribunal Dili.

“Kaikoli ne’e, eis DPR tingkat 1, ami atu harii sede veteranus, governu ne’e halo prosedimentu oinsa?,” dehan nia hafoin hasoru-malu ho PM Taur iha palasiu governu, Segunda (14/09).

Kona-ba fatin refere tuir planu sei harii edifisiu tribunal Dili, veteranu ne’e dehan, Prezidente TR tenke konsidera katak veranus no povu mak tau nia iha leten.

“Ami-nia intelektual barak atu debate ho nia, Tribunal ketak veteranu buat ketak ida, tanba ida tingkat 1 nian ne’ebé ema halo manifestasaun hasoru Indonezia ninian ne’e, tanba fatin istoria, defende istoria, vetaranu defende nia orijen,” dehan nia.

Prezidente TR Deolindo dos Santos dehan, ema hotu presiza atu respeitu veteranu sira no sira tenke iha fatin ne’ebé dignu, no governu atribui ona espasu propriu ba veteranu sira iha eis muzeu Komoro, edifisiu ne’ebé durante ne’e okupa husi Arte Moris.

“Agora governu atribui ona espasu propriu ba sira iha eis muze Komoro ne’ebé sira simu ona, sira ba iha ne’eba ona, iha maluk balun ne’ebé sei iha, agora sira mós simu ona, sira husik hela fatin ne’e ona, entaun signifika katak iha tempu badak nia laran halo nusa maka ita bele komesa husi obra Tribunál Dili nian,” dehan nia ba jornalista sira hafoin enkontru mensál ho Prezidente Repúblika Francisco Guterres Lú Olo iha palasiu Prezidensiál Bairu-Pite, Segunda (28/09).

Kondisaun tribunal Dili nian, tuir Deolindo, dook husi kondisaun ideal ba lei-nain sira atu hala’o sira-nia serbisu.

“Obra Tribunál Dili nian jornalista sira ba halo kobertura ne’e jornalista sira hatene rasik situasaun halo nusa, PTR labele esplika maibé jornalista sira haree ho matan, ne’ebé problema rezolvidu haree took halo nusa mak atu bele utiliza obra ne’e,” dehan nia.

Kona-ba orsamentu, nia dehan, orsamentu ba konstrusaun tribunal Dili preve dezde Orsamentu Jeral Estadu 2019, ho total kuaze millaun $11.

“Edifisu Tribunál Dili ne’e la’os públiku ko’alia katak orsamentu 2020 nian, laiha, ne’e orsamentu 2019 nian ne’ebé aprova tiha ona iha 2019 ne’e, agora ita labele konkretiza buat ne’e tanba razaun sira hanesan ita-boot sira hatene katak problema saúde mundiál (Covid-19) ne’ebé ita hotu hasoru,” katak nia.